बालेन विरुद्ध थौं नं प्रदर्शन

येँ (नेपालभाषा टाइम्स- येँ महानगरपालिकाया मेयर बालेन साह विरुद्ध थौं प्रदर्शन याइगु जूगु दु । वंगु पुस २८ गते येँया ३१ वडास्थित शंखमुलय् लँ तब्या यायेगु नामय् निजी जग्गाय् डोजर चले यानाः कब्जाया कुतः याःगुलिं पीडित जग्गाधनीया छेँजःपिनिपाखें थौं थ्व प्रदर्शन जुइत्यंगु खः ।

थौं सुथय् १०ः३० बजेनिसें थनया राष्ट्रिय सभागृह न्ह्यःने उगु प्रदर्शन यायेत्यंगु खः । राष्ट्रिय सभागृहय् थौंकन्हय् येँ मनपाया बोर्ड बैठक न्ह्यानाच्वंगु जूगुलिं बैठकय् ब्वति काः वःपिं मेयर, उपमेयर लिसें वडा अध्यक्षतय्त क्यने कथं थ्व प्रदर्शन यायेत्यंगु खँ धाःगु दु । पीडित जग्गाधनी साहेल सिंह महर्जनं कनादीकथं थ्व प्रदर्शन शान्ति– पूर्ण जुइसा थुकी थःपिनि दुःख प्वंकेगु ब्यानर जक ब्वयेगु ज्या जुइ ।

वंगु पुस २८ गते शंखमुलय् च्वंगु वय्कःया जग्गा कब्जा यानाः लँ तब्या यायेगु कुतः जूगु व उकी मनपां वय्कःयात छुं कथंया पौ तकं मबिउगु खः । वय्कलं थःगु जग्गा कायेगु लागिं मनपां छुं निर्णय याःगु दुसा पत्र माल धकाः थःपिं हे वनाः पौ काः वंगु इलय् नं मनपां पत्र मबिउगु खँ धाःगु दु ।

थ्वहे झ्वलय् नेवाः देय् दबू येँ महानगर कमिटीं थौं जुइगु विरोध प्रदर्शन ज्याझ्वःयात समर्थन याःगु दु । मनपां येँया स्थानीय जनताया जग्गा कब्जा यानाः दुःख बीगु ज्या याःगुलि उकिया विरोध यायेमाः धासें देय् दबूया येँ महानगर कमिटीं थौंया ज्याझ्वलय् सक्रिय रुपं ब्वति कायेगु निर्णय याःगु खः । थौंया ज्याझ्वलय् थः दुजःपिंत ल्हातय् हाकुगु कापः चिनाः ब्वति कायेगु लागिं नं देय् दबुलिं इनाप
याःगु दु ।

अथे हे साहेल सिंह महर्जनया जग्गा कब्जा याःगु खँय् ज्यापु महागुथिपाखें नं सरोकार क्यनेत्यंगु खँ सीदुगु दु । शंखमुलय् च्वंगु महर्जनया पुर्खौली जग्गा कब्जाया कुतः यानाः येँया ज्यापु जातियात हे विस्थापित यायेगु कुतः याःगु धासें ज्यापु महागुथिपाखें थुकी सरोकार क्यनेमाःगु खँ पिहां वःगु खः ।

वंगु छुं ई न्ह्यवंनिसें येँया थीथी थासय् डोजर चले यानाः सार्वजनिक व निजी सम्पत्ति हन्ताः यायेगु ज्याय् येँ महानगरपालिका न्ह्यचिलाच्वंगु कारणं मेयर बालेन साहया कडा आलोचना जुयाच्वंगु दु ।

माघ १५ य् फिब्व ख्यलय् प्रदर्शन
येँ मनपाया मेयर बालेन साहं यानाच्वंगु ज्यादतिया विरुद्ध थ्वहे वइगु माघ १५ गते थनया फिब्व ख्यलय् नं वृहत् प्रदर्शन याइगु जुयाच्वंगु दु । उकी शंखमुलय् निजी जग्गा कब्जाया कुतः याःगुलिं पीडित जूपिं छेँजःपिंलिसें येँ मनपाया थीथी ज्याखँपाखें पीडित जूपिं थीथी ख्यःया मनूतय्सं नं ब्वति काइगु खँ धाःगु दु ।

उपत्यकाव्यापी सडक विस्तार पीडित संघर्ष समितिया संयोजनय् उगु प्रदर्शन जुइत्यंगु खः । येँ मनपा थौंकन्हय् गुण्डागर्दी शैलीं येँया स्थानीय जनताया निजी व सार्वजनिक सम्पत्ति हड्पे यायेगु ज्याय् सक्रिय जुया वःगुलिं मनपा व मेयर साहयात सचेत यायेत थ्व प्रदर्शन यायेत्यनागु खँ धाःगु दु ।

सम्बन्धित बुखँ

LEAVE YOUR COMMENTS