म्हिगः येँय् ब्ल्याकआउट

येँ – गुथि विधेयक विरुद्ध आन्दोलन यानाच्वंगु राष्ट्रिय पहिचान संरक्षण संयुक्त संघर्ष समितिं सरकारयात खबरदारी यायेत म्हिगः येँय् ब्ल्याक आउट ज्याझ्वः यात । बहनी ७.३० बजेनिसें बाघौ तक सकस्यां मत स्यानाः ब्ल्याक आउट याःगु खः ।

सरकारं गुथि विधेयक लित काःसां अझ नं षडयन्त्र जुइफु धकाः खबरदारी यायेत व स्वम्ह मन्त्री (सञ्चार, भूमिसुधार व गृह) तय्गु राजीनामा माग यासें थ्व ब्ल्याक आउट ज्याझ्वः याःगु खः ।सरकारयात खबरदारी याना तयेगु लागिं आः मेमेगु ज्याझ्वः नं निरन्तर यानाच्वनेगु खँ संघर्ष समितिं धाःगु दु । थुकिया लागिं आः थासंथासय् जुलुस, ब्यानर प्रदर्शन, मशाल जुलुस व आवश्यक जुल धाःसा मोटरसाइकल ¥याली नं याना वनेगु खँ धाःगु दु ।

आन्दोलनया थप ज्याझ्वः क्वःछीगु लिसें आः आन्दोलनयात सांगठनिक रुपं नं व्यवस्थित यानाः न्ह्याः वनेगु लागिं थौं सहलह जुइत्यंगु खँ नं सीदुगु दु । गुथि विधेयक विरुद्ध आः फुक्कं संघर्ष समितितय्सं थःथःगु कथं ज्याझ्वः यायेगु व छथाय् जुइगु ज्याझ्वःलिसे मेगु ज्याझ्वः मल्वायेमा धकाः समन्वय याना वनेगु खँ नं धाःगु दु ।

वंगु असार ४ गते येँया फिब्व ख्यलय् (माइतीघर मण्डलाय्) जूगु तःजिगु प्रदर्शन लिपा थप ज्याझ्वः याना वने माल धकाः थासंथासय् इनाप वयाच्वंगु खँ नं संघर्ष समितिं धाःगु दु ।

थ्वहे दथुइ आः नेवाःतय्त गुथि सम्बन्धी गज्याःगु कानून माःगु खः धकाः अवधारणा दयेकेगु लागिं नं म्हिगःनिसें सहलह शुरु जूगु खँ सीदुगु दु । म्हिगः थ्व आन्दोलनय् आवद्ध न्ह्यलुवा व कार्यकर्तातय्सं अधिवक्तात शंकर लिम्बु, मुक्ति प्रधानपिंत सःताः थुकिया बारे प्रारम्भिक सहलह ब्याकूगु खः । उगु इलय् गुथिपाखें याइगु थीथी ज्याझ्वःयात अन्तर्राष्ट्रिय कानून व आदिवासी जनजाति अधिकार सम्बन्धी राष्ट्र संघीय सन्धि कथं नं प्रथाजन्य कानून (कस्टमरी ल) या मान्यता बियातःगु जुयाः आः नेपाः राज्यपाखें नं थ्वहे अधिकार प्राप्त यायेगु ल्याखं गुथि सम्बन्धी कानून दयेकेमाः धकाः माग यायेगु सहमति जूगु खँ सीदुगु दु ।

सम्बन्धित बुखँ

LEAVE YOUR COMMENTS