चिनियाँ राजदूत विरुद्ध लोसपाया प्रदर्शन
येँ (नेपालभाषा टाइम्स)÷ नेपाःया नितिं चिनियाँ राजदूत चेन सोङं नेपाः–भारत सम्बन्धय् बियादीगु अभिव्यक्ति विरुद्ध म्हिगः लोकतान्त्रिक समाजवादी पार्टीं महोत्तरीया जलेश्वरय् प्रदर्शन यात । भारत व नेपाःयात स्वानाः बिउगु अभिव्यक्ति कुटनीतिक मर्यादा अःखः जूगु धासें राजदूत सोङयात लित छ्वयेमाःगु माग नं लोसपां याःगु दु ।
लोसपाया कार्यकारिणी दुजः लिसें मधेश प्रदेशया अध्यक्ष जितेन्द्र सोनालं राजदूत सोङं नेपाः व भारतया आर्थिक सम्बन्धय् याःगु टिप्पणी कुटनीतिक मर्यादा अःखःजूगु द्वपं बियादीगु दु ।
वय्कलं सार्वभौमसत्ता सम्पन्न देय्या बारे थज्याःगु अभिव्यक्ति बियाः नेपाःयात हेपे याःगु धासें राजदूत सोङयात स्पष्टीकरण सहित लित छ्वयेत सरकारयात माग नं यानादिल । प्रधानमन्त्री पुष्पकमल दाहालया चीन भ्रमण न्ह्यःने चिनियाँ राजदूत विवादय् लानाच्वंगु दु ।
LEAVE YOUR COMMENTS