हलिं नेवाः गुथिया थीथी कचाया तःमुँज्या

ख्वप (नेपालभाषा टाइम्स) – हलिं नेवाः गुथिया थीथी कचाया तःमुँज्या जूगु दु । थ्व झ्वलय् गुथिया ख्वप कचाया तःमुँज्या वंगु शनिवाः जुल । थ्व स्वयां न्ह्यः वंगु पुसया न्हापांगु वालय् काभ्रे जिल्ला दच्वया दाप्चा व क्वाथ दाप्चा कचाया नं तःमुँज्या जूगु खः ।

नेवाः देय् दबू ख्वप कचाया ज्याकुथिइ जूगु तःमुँज्याय् गुथिया केन्द्रीय प्रतिनिधिकथं मू दुजः कृष्णप्रसाद प्रजापति मूपाहांकथं झायादीगु खः । ख्वप कचाया सल्लाहकार योगी स्यस्यःया मदुम्ह मांया लुमन्तिइ छगू मिनेट मौन धारण यासें न्ह्याःगु तःमुँज्याया मूपाहांपाखें ब्यानर वाचन यानाः ज्याझ्वःया उलेज्या यानादीगु खः । गुथिया ख्वप कचाया तदर्थ कमिटीया न्वकु रामचन्द्र प्रजापतिं लसकुस यानादीगु ज्याझ्वलय् सल्लाहकार बद्रीनारायण कर्माचार्य व नायः पूर्णभक्त दुवालं नेवाः पहिचान व सभ्यताया थीथी पक्षयात कयाः नुगःखँ तयादीगु खः ।

ज्याझ्वलय् मूपाहांकथं झायादीम्ह केन्द्रीय दुजः प्रजापतिं गुथिया म्हसीका बियादिसें गुथिं याना वयाच्वंगु थीथी गतिविधिया बारे जानकारी नं बियादीगु खः । उगु तःमुँज्यालिपा ख्वप कचाया नायः पदया निंतिं जूगु ल्यज्याय् पूर्णभक्त दुवाल अप्वः मत हयाः निर्वाचित जुयादीगु खःसा तदर्थ समितिया छ्याञ्जे कृष्ण प्रजापति गुथिया केन्द्रीय दुजः पदय् निर्वाचित जुयादीगु खः ।

तःमुँज्या लिपा ख्वप कचां न्हूपिं दुजः दयेकेगु नापं औपचारिक मतदान, मत गणना यायेगु नापं निर्वाचित प्रतिनिधिया घोषणा नं याःगु खः ।