यलय् अरनिकोया छेँ गन दु ?

यल(नेपालभाषा टाइम्स)÷यल महानगरपालिकाया मेयर चिरिबाबु महर्जनं राष्ट्रिय विभूति कलाकार अरनिकोया छेँयात संग्रहालय दयेकाः सुरक्षित यायेगु खँ कनादीगु दु । नेपाल व्यावसायिक कलाकार सङ्घया २८ क्वःगु स्थापना दिवस तथा राष्ट्रिय विभूति कलाकार अरनिको स्मृति दिवसया लसताय् लाकाः जूगु छगू ज्याझ्वलय् न्ववासें वय्कलं उगु खँ धयादीगु खः ।

ललितपुर मनपा वडा नं. ६ लय् अरनिकोया छेँ दु धासें मेयर महर्जनं उगु छेँयात आः संग्रहालय दयेकेगु खँ कनादीगु खः । डा. के.के. पाण्डें च्वयादीगु छगू सफुतिइ यल महानगरपालिका वडा नं ६ लय् अरनिकोया छेँ दु धकाः उल्लेख यानातःगु खँ न्ह्यथनादिसें मेयर महर्जनं उगु छेँयात संग्रहालय दयेकेगु लागिं थम्हं वडा नं. ६ या वडाध्यक्षलिसे समन्वय यानाच्वनागु खँ नं कनादिल ।

झिंस्वंगूगु शताब्दीया नांजाःम्ह कलाकार अरनिको नेपालं १७ दँया उमेरय् ९९ म्ह कलाकारतय् पुचःया नेतृत्व यासें चीन वनाः अन नेपाली कला व कौशलया प्रचारप्रसार यानादीगु खँ कनादिसें मेयर महर्जनं अरनिकोया जन्मस्थल यल देसय् हे दुगु खँ नं कनादिल ।

वय्कलं धयादिल, ‘वय्कः च्वनादीगु छेँ आः छु अवस्थाय् दु वहे अवस्थाय् तयाः संरक्षण र सम्वद्र्धन यानाः संग्रहालयया रुपय् विकास यायेत जि प्रतिबद्ध दु ।’

मेयर महर्जनं अरनिकोया छेँ संग्रहालय दयेकेगु धकाः घोषणा यानादीसां यलया इतिहासविज्ञतय्सं धाःसा यलय् अरनिकोया छेँ गन दु धकाः आः तक पत्ता लगे मजूनिगु खँ कनादीगु दु । वाङमय शताब्दीपुरुष सत्यमोहन जोशीं सन् १९७१ य् अरनिको सम्बन्धि सफू पिकायेवं तिनि नेपालय् अरनिको बारे चर्चा जूगु खः । मेयर महर्जनं अरनिकोया छेँ संग्रहालय दयेकेगु धयादीवं यलया विज्ञतय्सं आश्चर्य प्वंकादीगु दु ।