कोथुननि बचे यायेत न्हूगु चरणया आन्दोलन

येँ – असंया कोथुननि बचे यायेत न्ह्यानाच्वंगु हस्ताक्षर अभियान थौं क्वचाइगु जूगु दु । हस्ताक्षर अभियान थौं क्वचायेकाः मेगु चरणया आन्दोलन यायेगु खँ धाःगु दु । थौं जुइगु हस्ताक्षर संकलन ज्याया समापन ज्याझ्वलय् थीथी संघसंस्थायात ब्यानर सहित ब्वति कायेत नं असं कोथुननि बचाउ अभियान समितिं इनाप याःगु दु ।

समितिं सामाजिक सञ्जालय् छगू प्रेस विज्ञप्ति जारी यासें नेवाः खलः पुचः लिसें जातीय संगठनयात बाजा गाजा सहित थौंया ज्याझ्वलय् ब्वति कायेत इनाप याःगु खः । लिसें थौं हस्ताक्षर संकलन अभियान क्वचाःगु घोषणाया नापनापं न्हूगु चरणया आन्दोलन घोषणा यायेत तयारी नं यानाच्वनागु खँ सीदुगु दु ।

अभियानया नायः नमस्ते साय्मिं गुथि संस्थानं शान्तिपूर्ण आन्दोलनयात वेवास्ता याःगु धासें न्हूगु चरणया आन्दोलन यायेमाःगु खँ कनादीगु दु । गुथि संस्थानं कोथुननि थुनाः अन व्यापारिक कम्प्लेक्स दयेकेगु निंतिं सम्झौता याःगु खःसा उकिया विरोधय् स्थानीय वासिन्दाया लिसें कोथुननिइ च्वना वयाच्वंपिंसं थीथी कथंया ज्याझ्वः याना वयाच्वंगु दु ।

गुथि संस्थानं थःपिनिगु मागया सुनुवाइ मयाःगु धासें आः जुइगु आन्दोलन अझ कडानक्सां न्ह्याइगु खँ नं अध्यक्ष साय्मिं कनादीगु दु ।
थौं न्हिनय् ४ बजे जुइगु हस्ताक्षर संकलन समापन ज्याझ्वःयात सांसद लिसें पुलांम्ह रक्षामन्त्री भीमसेनदास प्रधान, सांसदपिं रामवीर मानन्धर, बसन्त मानन्धर व येँ महानगरपालिकाया उपमेयर हरिप्रभा खड्गीं सम्बोधन यानादी ।

थ्वहे झ्वलय् वइगु आइतवाः सुथय् ७ बजे वंघलंनिसें थँबही तक छगू ¥याली यायेगु तयारी जुयाच्वंगु दु । पलेस्वां पुखू बचाउ अभियानया ग्वसालय् उगु ¥याली जुइत्यंगु खः । पलेस्वां पुखू म्हासे यानाः अन छायाँदेवी कम्प्लेक्स दयेकूगु धासें उकिया विरोधय् स्थानीय जनतां विरोध याना वयाच्वंगु दु ।