ख्वपय् धुं मचायात नल

ख्वप– ख्वपया सूर्यविनायक नगरपालिका ७ गुण्डुइ छम्ह मचाया धुं नःगु खँ धाःगु दु । सोमवाः सनिलय् पसः वनाः लिहां वयाच्वंम्ह गुण्डु खहरेया सुनिल तामाङया खुदँ दुम्ह काय शिरीष तामाङयात धुं आक्रमण यानाः जंगलय् सालायंकाः नःगु खँ प्रहरीं धाःगु दु ।

पसः वनाच्वंम्ह मचा आकाझाकां तनेवं स्थानीय वासिन्दा, प्रहरी, नेपाली सेनाया पुचलं चान्हय् १० बजे बालकुमारी सामुदायिक वनय् मचाया सीम्ह लुइकूगु खँ महानगरीय प्रहरी परिसर ख्वपया प्रवक्ता कृष्ण प्रसाँइ धयादीगु दु ।

मचायात धुं आक्रमण यानाः सालायंकूगु आशंका यानाः माला वंबलय् जंगलय् धुं नयातःगु अवस्थाय् मचाया सीम्ह लुइकूगु खः । मनूतय् भीड खनाः धुं बिसिउँ वंगु खँ प्रहरीं धाःगु दु । सीम्ह परीक्षणया निंतिं ख्वप अस्पतालय् यंकूगु दु ।