सुनार–प्रधान प्रकरणय् राजनीति

येँ -दलितयात क्वथा बालं मबिउ धइगु द्वपनय् प्रहरी हिरासतय् च्वनेमाःम्ह छेँथुवाः सरस्वती प्रधान व वय्कः विरुद्ध उजुरी तःम्ह रुपा सुनार दथुइ वार्ता याकेगु लागिं कुतः जुयाच्वंसां थ्व ताःलाके मफयाच्वंगु खँ सीदुगु दु ।

थौंकन्हय् वय्कःपिं निम्हं सुयातं छुं मधासें मौन जुयाच्वंसां थ्व मुद्दाया पक्ष व विपक्ष निगुलिं खेमाया मनूतय्सं धाःसा सामाजिक सञ्जालय् व्यापक रुपं थःगु खँ तयेगु याना हे च्वंगु दु । थुकिं यानाः स्थिति तनावपूर्ण जुयाच्वंगु खँ धाःगु दु ।

थ्वहे झ्वलय् रुपा सुनारं मुद्दा तयेवं चर्चाय् वःगु थ्व प्रकरणय् वैज्ञानिक समाजवादी पार्टी आवद्ध जुयाच्वुं कारणं थ्व मुद्दां राजनीतिक रुप काइगु सम्भावना दुगु खँ धाःगु दु । उगु पार्टीं थ्व मुद्दायात न्ह्यःने तयाः आः थःगु पार्टीयात स्थापित यायेगु अवसरया रुपय् प्रयोग यायेत स्वयाच्वंगु खँ नं विज्ञ सूत्रतय्सं धाःगु दु ।

थ्व मुद्दाया लिउने छगू राजनीतिक पार्टी हे लगे जूगु कारणं दलितलिसे स्वापू दुगु छुं नं संघ संस्था वा संगठन न्ह्यःने मवःगु खँ नं धाःगु दु । दलितया मुद्दायात न्ह्यःने तयाः राजनीतिक लबः कायेगु नियत सुलाच्वंगु जूगुलिं दलित सम्बन्धी संघ संगठनतय्सं थुकी प्रत्यक्ष साथ मबिउगु खँ नं विज्ञ सूत्रं धाःगु दु ।

अथे हे रुपा सुनारं छेँथुवाः प्रधानयात गलत द्वपं बियाः प्रहरी हिरासतय् कुनेगु ज्या याःगु लिसें गैर कानुनी रुपं फोन वार्ता टेप यायेगु ज्या नं याःगु धासें उकिया विरुद्ध मुद्दा तयेगु लागिं नं कुतः जुयाच्वंगु खँ सूत्रतय्सं धाःगु दु ।