जनमत व उन्मुक्ति मोर्चाबन्दी

येँ (नेपालभाषा टाइम्स)- वंगु चुनावय् तराई लागां उदय जुया वःगु निगू न्हूगु शक्ति जनमत पार्टी व नागरिक उन्मुक्ति पार्टी दथुइ मोर्चाबन्दी जूगु दु । जनमत पार्टीया अध्यक्ष डा. सीके राउत व नागरिक उन्मुक्ति पार्टीया अध्यक्ष रञ्जिता श्रेष्ठ चौधरीं म्हिगः १२ बुँदे सहमतिइ हस्ताक्षर यासें आः नापं ज्या याना वनेगु कथं मोर्चाबन्दी याःगु खः ।

निगू दल दथुइ जूगु सहमति कथं रेशम चौधरी लिसें टिकापुर घटनाया राजबन्दीतय्त त्वःतेगु निंतिं मंकाः कथं कुतः यायेगु, देउवा सरकारं हःगु मुलुकी फौजदारी कार्यविधि संहिता संशोधन अध्यादेशयात संसदं कानुनया रुपय् पास यायेत सरकारयात दबाब बीगु व लाल आयोगया प्रतिवेदन सार्वजनिक यायेत पहल यायेगु ज्या जुइ ।

आन्दोलनया झ्वलय् निगुलिं दलया कार्यकर्तातय्त तयातःगु मुद्दा लित कायेकेगु, राउतलिसे २०७५ फागुन २४ गते जूगु सम्झौता कार्यान्वयन याकेगु, नागरिकता विधेयक पास व किसान आन्दोलनया मुद्दा कार्यान्वयन यायेत दबाब बीगु खँय् नं सहमति जूगु दु । निगुलिं दलं प्रधानमन्त्रीयात विश्वासया मत बी न्ह्यः थःपिनिगु दथुइ सहमति जूगु ११ बुँदाया सम्बोधन जुइमाःगु खँ धाःगु दु ।

निगू पार्टीया अध्यक्षपिंसं हस्ताक्षर याःगु सहमतिइ संघ व प्रदेश सरकारय् ब्वति कायेबलय् मंकाः सहमति कार्यान्वयन यानाः छप्पँ जुया वनेगु खँ नं न्ह्यथनातःगु दु । उकथं हे थःपिनिगु माग पूमवंतले संघ व प्रदेशया सरकारय् मवनेगु सहमति नं निगू दल दथुइ जूगु दु ।

सरकारया समर्थन व विपक्ष
थ्वहे झ्वलय् माओवादी नेतृत्वया वर्तमान सरकारय् नागरिक उन्मुक्ति पार्टी सहभागी मजुसे प्रतिपक्षी बेञ्चय् च्वनीगु जूगु दु । प्रतिनिधिसभाया न्हापांगु बैठकय् प्रतिपक्षी बेञ्चय् च्वनेगु निर्णय जूगु खँ कनादिसें पार्टी अध्यक्ष रञ्जिता श्रेष्ठं धयादिल, ‘जिमिसं प्रतिपक्षी बेञ्चय् च्वनेगु धकाः संसद सचिवालययात जानकारी याकागु दु ।’ रेशम चौधरीयात त्वःतेमाःगु थःपिनिगु मू मुद्दा जूगु धासें माओवादी केन्द्रया अध्यक्ष पुष्पकमल दाहालयात विश्वासया मत बीगु वा मबीगु धइगु निर्णय धाःसा मजूनिगु खँ नं वय्कलं कनादिल ।

प्रधानमन्त्री पुष्पकमल दाहालं कन्हय् विश्वासया मत कयादीत्यंगु दु । थ्व सरकारयात विश्वासया मत बीत राष्ट्रिय स्वतन्त्र पार्टी, राप्रपा नेपालं निर्णय यायेधुंकूगु दु । राप्रपां थःपिनि शर्त स्वीकार यात धाःसा प्रधानमन्त्री दाहालयात विश्वासया मत बीगु धकाः निर्णय याःगु खः । राप्रपां विश्वासया मत कायेगु न्हि कुन्हु मतदान जुइगु इलय् फुक्कं सांसदत उपस्थित जुइत नं निर्देशन बिउगु दु ।

उकथं हे लोकतान्त्रिक समाजवादी पार्टीं विश्वासया मत सम्बन्धी निर्णय यायेगु अधिकार अध्यक्ष महन्थ ठाकुरयात बिउगु दु । आम जनता पार्टीया अध्यक्ष प्रभू साह व स्वतन्त्र अमरेशकुमार सिंहंपिं नं विपक्षी बेञ्चय् च्वनेगु धकाः निर्णय याःगु दु ।