
येँ(नेपालभाषा टाइम्स)÷झिंस्वक्वःगु नेवाः एकता दिवस थ्व हे वंगु पोहेलाथ्व नवमि शनिवाःकुन्हु चन्द्रागिरि नगरपालिकाया बलम्बुइ जुल । गुर्जुधारां सांस्कृतिक बाजंसहित छगू ¥याली पिथनाः बलम्बुइ सभाय् हिउगु खः ।
नेवाः देय् दबू व श्रीज्यापु महागुथि चन्द्रागिरि नगर समितिया व्यवस्थापनय् न्ह्याःगु ज्याझ्वलय् देय् दबूया केन्द्रीय न्वकु उमेश स्थापितं लसकुस यासें नेवाः एकता दिवसया औचित्ययात कयाः नुगःखँ तयादीगु खः ।
ज्याझ्वःया सभापति नेवाः देय् दबूया केन्द्रीय नायः पवित्र वज्राचार्यं नेवाः एकताया महत्वयात थुइकाः थुकथं नेवाःत छप्पँ जुयाः कुहां वयाः नेवाः सभ्यता ल्यंका तयेत खः धयादिल । ‘नेवाःतय् भाषा, कला, सभ्यता, संस्कृति, कला, सम्पदा ल्यना च्वंसा जक नेवाःतय् नं अस्तित्व ल्यनाच्वनी’ वय्कलं धयादिल ।
ज्याझ्वलय् आदिवासी जनजाति महासंघ नेपालया अध्यक्ष गेल्जेन लामा शेर्पा, आदिवासी जनजाति आयोगया अध्यक्ष रामबहादुर थापामगर, बागमति प्रदेशसभा सदस्य रमा आलेमगर,, चन्द्रागिरि नगरपालिकाया उपप्रमुख वसन्ती श्रेष्ठं नुगःखँ तयादीगु ज्याझ्वलय् चन्द्रगिरि नगरपाकिाया प्रमुख घनश्याम गिरिं छ्वया हःगु भिंतुना सन्देश ब्वनाः न्यंकूगु खः ।
नेपाःया राष्ट्रिय गानलिसें नेवाः राष्ट्रिय म्येँ हायेकाः न्ह्याःगु ज्याझ्वलय् बलम्बुया परम्परागत द्वारे व द्वारे नायःयात नं दबुलिइ ब्वनाः नेवाः एकताप्रति प्रतिवद्धता प्वंकेगु ज्या जूगु खः ।
एकता दिवसया संयोजनय् दुथ्याःगु छगू घटक लोकतान्त्रिक नेवाः संघया नायः भगवान शाक्यं बलम्बु घोषणा पौ ब्वनाः न्यंकूगु ज्याझ्वःया झ्वलय् बलम्बुया स्थानीय नेवाः मिसात जक जानाः रञ्जना लिपिया क्यालिजात्रा नं याःगु खः ।
LEAVE YOUR COMMENTS