अमेरिकां युरापय् थप स्वद्वः सैनिक तैनाथ याइगु

एजेन्सी- युक्रेनय् रुसं हमला यायेफुगु धासें अमेरिकां युरोपया थीथी देशय् थप स्वद्वः सैनिक छ्वइगु जूगु दु । अमेरिकाया पेन्टागनं बिउगु जानकारीकथं २००० म्ह सैनिक नर्थ क्यारोलिनां पोल्याण्ड व जर्मनी छ्वइगु व जर्मनीइ दुपिं द्वःछिम्ह सैनिकयात रोमानियाय् छ्वइगु बिबिसीं जानकारी बिउगु दु ।

‘युरोपय् अमेरिकां छ्वयेत्यंपिं सैनिकत युक्रेनय् लडाइ यायेत वनेत्यंगु मखु, नेटो आबद्ध देय्या सुरक्षाया निंतिं जक वनेत्यंगु खः’ अमेरिकां धाःगु दु । अमेरिकां नेटो गठबन्धन सेनायात युरोपय् ग्वाहालि यायेत थ्वयां न्ह्यः च्याद्वः व न्यासः सैनिकतय्त हाइ अलर्टय् च्वेनत धाःगु खः ।

रुसं अमेरिकाया थ्व निर्णययात विनाशकारी पलाः धाःगु दु । मस्काें युक्रेनय् हमला यायेगु थःपिनि छुं योजना मदुु धयावयाच्वंगु दु, अथेखःसां रुसं युक्रेनया सीमाय् छगू लाख हतियारधारी सैनिक तैनाथ यनातःगु दु । युक्रेनं नं पश्चिमा देय्तय्त थःपिंथाय् आक्रमण जुइ धकाः ख्याच्व मबित इनाप यानाच्वंगु दु । पश्चिमा देय्तय्सं रुसं युक्रेनय् आक्रमण याइ त्यंगु दु ख्याच्व बियाच्वंगुलिं युक्रेनया अर्थव्यवस्थाय् असर लाःगु खँ युक्रेनी सरकारं धाःगु दु ।

रुसं युक्रेनया दक्षिणी लागा क्रिमिया कब्जा याःगु च्यादँलिपा थ्व संकट खनेदुगु खः । मस्कों युक्रेन सरकारयात पूर्वी लागाय् शान्ति पुनस्र्थापनाया निंतिं अन्र्तराष्ट्रिय सम्झौता लागु यायेत असफल जूगु द्वपं बियावयाच्वंगु दु । उगु लागाय् थ्यंमथ्यं १४ द्वः मनूत सीधुंकूगु दुसा रुस समर्थित विद्रोहीतय्सं यक्व हे लागाय् नियन्त्रण यानातःगु दु ।

सम्बन्धित बुखँ

LEAVE YOUR COMMENTS