कोरोनायात गम्भिर रुपं कयादिसँ

येँ (नेपालभाषा टाइम्स) – बागमति प्रदेशया मुख्यमन्त्री डोरमणि पौडेलं कोरोना भाइरसया संक्रमणपाखें बचे जुइत सामाजिक दूरी कायम यानाः स्वास्थ्य सुरक्षा मापदण्ड कडा रुपं पालना यायेत इनाप यानादीगु दु ।

कोरोना भाइरसपाखें संक्रमित जुयाः वासः याकाच्वनादीम्ह मुख्यमन्त्री पौडेलं छगू सन्देश जारी यासें कोरोना संक्रमणया महामारीयात संवेदनशील जुयाः गम्भिरतापूर्वक कायेत नं इनाप यानादीगु दु । मुख्यमन्त्री पौडेललिसें वय्कःया जहानयात वंगु कात्तिक ७ गते कोरोना संक्रमणया पुष्टि जुइवं थौंकन्हय् थनया बाँसबारीस्थित सहीद गंगालाल राष्ट्रिय हृदयरोग निवारण केन्द्रय् वासः याकाच्वनादीगु दु । थः व थः जहानया स्वास्थ्य सुधार जुय वयाच्वंगु व याकनं हे थः कोरोनामुक्त जुया कार्य क्षेत्रय् लिहां वयेगु नं धयादीगु दु ।

मुख्यमन्त्री पौडेलया थगुने जक गंगालाल अस्पतालय् हे नुगःचुया एन्जिओप्लास्टी तकं यायेगु ज्या जूगु खः । आवश्यक सुरक्षा प्रोटोकल अवलम्बन यायेक यायेकं नं थःपिंत संक्रमण जूगु सन्देशय् धयातःगु दु ।