बागमति प्रदेशया संसदतय्त हना

येँ(नेपालभाषा टाइम्स)- नेवाः देय् दबू स्वनिगः विशेष प्रदेश समितिं बागमति प्रदेशय् स्वनिगःपाखें प्रतिनिधित्व यानादीपिं प्रदेश सांसदतय्त हनेज्या याःगु दु । समितिया ग्वसालय् वंगु शनिवाः बागमति प्रदेशय् प्रत्यक्षपाखें निर्वाचित व समानुपाति यानाः न्यय्स्वम्ह सांसदयात हनेज्या याःगु खः ।

स्वनिगः विशेष प्रदेशया नायः श्रीकृष्ण महर्जनया सभापतित्वय् जूगु ज्याझ्वलय् मूपाहांकथं देय् दबूया केन्द्रीय नायः पवित्र वज्राचार्य झायादीगु खः । स्वनिगःपाखें प्रतिनिधित्व यानादीपिं सकलें सांसदतय्त हनेज्या यायेगु धयातःगु खःसां नीच्याम्ह सांसद जक उपस्थित जुयादीगु खः । सकलें सांसदतय्त नेवाः परम्पराकथं ख्यें सगं बिउगु खःसा मिजं सांसदतय्त बेतालिं चिकेगु व मिसा सांसदतय् दोसल्लां न्ययेकाः हनेज्या याःगु खः ।

उगु इलय् स्वनिगः बागमति प्रदेशय् नेपालभाषायात सरकारी कामकाजया भाय्या रुपय् मान्यता बीत याःगु सिफिारिस, प्रदेश समितिं याःगु गतिविधि, चुनाव न्ह्यः राजनीतिक दल व उम्मेदवारतय्त बिउगु नेवाः मंकाः मुद्दाया ध्यानाकर्षण पौ नं लःल्हाःगु खः ।

ज्याझ्वलय् बागमति प्रदेश उपसभामुख अप्सरा चापागाइँ खत्री, प्रदेश सांसदपिं नेकपा (माओवादी केन्द्री)या देवेन्द्र श्रेष्ठ, नेकपा (एमाले)या जयराम थापा, नेपाली कांगे्रसया हरिप्रभा खड्गी, राप्रपाया राजेन्द्र प्रजापति, हाम्रो नेपाली पार्टीया शैलेन्द्रमान वज्राचार्यं नेवाः मंकाः मुद्दायात निंतिं थःपिंसं आवश्यककथं थःथःगु थासं पलाः ल्ह्वनेगु प्रतिवद्धता प्वंकादीगु खः ।

ज्याझ्वलय् स्वनिगः विशेष प्रदेशया न्वकु डा. अनिता प्रधानं लसकुस यानादीगु ज्याझ्वलय् येँ जिल्लाया नायः धनबहादुर महर्जन तिमिला, ख्वप जिल्लाया नायः नरेश नेवाः व यल जिल्लाया वरिष्ठ न्वकु कृष्णभक्त डंगोलं थःथःगु नुगःखँ तयादिसें भिंतुना न्वचु बियादीगु खः ।