२० दँ लिपा कलाःयात स्याःम्ह ज्वन

येँ (नेपालभाषा टाइम्स) – प्रहरीं थः कलाःयात स्याःगु द्वपनय् छम्ह मनूयात २० दँ लिपा ज्वंगु दु। दोल्खाया भीमेश्वरस्थित ताथलि छेँ जुयाः थौंकन्हय् येँय् च्वना वयाच्वंम्ह अरुणकुमार रिजाल (सुनिल) यात प्रहरीं ज्वंगु खः ।

अरुणकुमार विरुद्ध थनिं २० दँ न्ह्यः २०५७ सालय् थः कलाः दिलमायायात स्याःगु द्वपं लानाच्वंगु खः । घटना जूगु इलंनिसें हे बिसिउँ वनाच्वंम्ह अरुणयात वंगु आइतवाः प्रहरीं ज्वनाः जिल्ला अदालत येँय् पेश याःगु दु। अदालतं अरुणयात पुर्पक्षया निंतिं थुनाय् तयेत आदेश बिउगु प्रहरी प्रधान ज्याकुथिं न्ह्यथंगु दु ।

थःगु हे क्वथाय् सिनाच्वंगु अवस्था लूम्ह दिलमायाया हत्याया घटनायात कयाः तत्कालीन इलय् महानगरीय प्रहरी वृत्त कालिमातिपाखें घटनायात कयाः अनुसन्धान याःगु इलय् वयात रिजालं हे गःपः तियाः स्याःगु खुले जूगु खः । घटना लिपा फरार जुयाच्वंम्ह अरुणयात ज्वनाः अदालतय् पेश याःगु खः वयागु विरुद्ध आः कानूनी कारवाही न्ह्यानाच्वंगु प्रहरीं जानकारी बिउगु दु ।