तिंख्यलय् भूमिगत पार्किङ विरुद्ध मनपा न्ह्यःने प्रदर्शन
येँ (नेपालभाषा टाइम्स)÷तिंख्यःया चकं दबुली भूमिगत पार्किङ दयेकेगु धकाः येँ महानगरपालिकां याःगु तयारी विरुद्ध सम्पदा अभियन्ता व येँया स्था–नीय जनतां येँ मनपाय् ज्ञापनपौ बिउगु दु । म्हिगः महानगरपालिका ज्याकू पिने करिब घौत्या धर्ना बियाःलि वयां लिपा मनपा ज्याकुथी वनाः ज्ञापनपौ बिउगु खः । शुरुइ ज्ञापनपौ मनपाया मेयर बालेन साहयात बीगु धकाः ज्याझ्वः दुगु खःसां मेयर साह ज्ञापनपौ कायेत मवःगुलिं उपमेयर सुनिता डंगोलयात लःल्हाःगु खः ।
ज्ञापनपौ लःल्हाना कासें उपमेयर डंगोलं जनचाहना अःखः तिंख्यलय् भूमिगत पार्किङ मदयेकेगु खँ धयादिल । वय्कलं स्थानीयवासीया सुझाव मदयेक गुगुं नं कथंया ज्या मन्ह्याकेगु प्रतिवद्धता नं प्वकादीगु खः । म्हिगः ‘अकुपाई टुँडिखेल’पाखें ब्यानर सहित प्रदर्शन यासें मनपा ज्याकू घेराउ याःगु खः ।
उपमेयर डंगोलं आः काठमाडौं प्लाजा, धरहराय् दयेकाच्वंगु भूमिगत पार्किङं फुक्कं समस्या ज्यंकीगु जूगुलिं थप संरचना आवश्यक मजू धासें तिंख्यः ऐतिहासिक लिसे सांस्कृतिक ल्याखं नं महत्वपूर्ण जूगुलिं थुकिया संरक्षण यायेमाःगु बिचाः नं प्वंकादिल ।
नगर विकास कोषयात थुकिया सम्भाव्यता अध्ययन यायेगु जिम्मेवारी महानगरं बियागु धासें वय्कलं उगु अध्ययन लिपा डीपीआर यायेमाः कि म्वाः धइगु खँया निर्णय जुइगु जानकारी नं बियादिल । थुकिया प्रि–फिजि बिलिटी अध्ययनया नितिं महानगरं टाउन डेभलपमेन्ट फन्डयात जिम्मेवारी बियागु खँ कँसें वयां लिपा जक डीपीआर यायेगु वा मयायेगु धइगु निर्णय जुइगु व डीपीआर लिपा नं दयेकेगु कि मदयेकेगु धइगु निर्णय जुइगु खँ कनादिल ।
वंगु कार्तिकय् येँ मनपाया कार्य पालिका बैठकं तिंख्यलय् ‘ट्रिपल बेसमेन्ट’ पार्किङ व लः हाकनं रिचार्ज जुइगु विस्तृत परियोजना प्रतिवेदन (डीपीआर) दयेकेगु निर्णय याःगु खः । येँ मनपाया उगु निर्णययात कयाः विवाद ब्वलनाच्वंगु दु । सूत्रतय्सं धाःकथं अन पार्किङ दयेके मजिउ धकाः तःगू हे थासं दबाब वःसां नं मेयर साह धाःसा अझ नं लिचिउगु मदुनि ।
मेयर थ्यंकः मवल
अकुपाई टुँडिखेलपाखें म्हिगः ज्ञापनपौ बीगु धकाः योजना देयेकेवं मेयर बालेन साहं शुरुइ ज्ञापन पौ लःल्हाना कायेगु धाःगु खःसां लिपा हानं थः मलात धासें ज्ञापनपौ बुझे यानामदी । वय्कलं म्हिगः हे राष्ट्रपतिपाखें जनप्रतिनिधितय्त नापलायेगु धकाः सःताहःगुलिं थः ज्ञापनपौ लःल्हानाः काः वये लाइ मखु धकाः सुचं बियादीगु खः । तर सूत्रतय्सं धाःसा राष्ट्रपतियाथाय् वये धकाः वय्कः थम्हं हे म्हिगःया ई कयादीगु खँ धाःगु दु । वय्कलं खास यानाः न्ह्यःने वयाच्वंगु नगर परिषद्या बैठकय् थ्व पार्किङ सम्बन्धी विवाद दुहां मवयेमा धकाः कुतः याना च्वनादीगु खँ सूत्रं धाःगु दु ।
LEAVE YOUR COMMENTS