नां व राजधानी क्वःछीवं पुत्ला च्याकल

येँ- प्रदेश २ या नामाकरण व प्रदेशया स्थायी राजधानी तोके यायेगु नितां ज्याया विरुद्ध वीरगञ्ज व जनकपुरय् प्रदर्शन शुरु जूगु दु । २ नम्बर प्रदेशया नां ‘मधेस’ तल धकाः म्हिगः जनकपुरय् ल्याय्म्हतय्सं प्रदर्शन याःगु खः । थ्व प्रदेश २२ गू जिल्लाय् न्यना वनाच्वंगु दुसां च्यागू जिल्लायात जक कःघानाः मधेस प्रदेश नां तल धासें थुकियात थःपिंसं स्वीकार याये मफइगु खँ उमिसं धाःगु दु ।

तराई लागाय् च्यागू जिल्लायात जक मधेस धाइ धासें थ्व प्रदेशया नां ‘मिथिला भोजपुरा’ तयेमाःगु माग नं उमिसं याःगु दु । जनकपुरया जानकी चोकय् प्रदर्शन यासें उमिसं मुख्यमन्त्रीया लालबाबु राउतया पुत्ला च्याकूगु खः । थ्व नांया कारणं थःपिनिगु पहिचान गुमे जूगु द्वपं उमिसं बिउगु दु ।

मेखे प्रदेशया स्थायी राजधानी वीरगञ्ज तोके मयासे जनकपुर तोके यात धकाः म्हीगंनिसें हे वीरगञ्जय् नं प्रदर्शन शुरु जूगु दु । वीरगञ्जया नेपाली कांग्रेस कार्यकर्तातय्सं म्हीग अन छगू मोटरसाइकल ¥याली समेत पिकाःगु खःसा दुवाः दुवातय् मुख्यमन्त्री लालबाबु राउतया पुत्ला नं च्याकूगु खः । राउत वीरगञ्ज निवासी खः ।

प्रदर्शनकारीतय्सं म्हीग मुख्यमन्त्री राउतया छेँय् अप्पां समेत कयेकूगु खः । उकी लानाः राउतया छेँया झ्याःया न्हाय्कं तज्याःगु खः । सीसीटिभी फुटेजपाखें अप्पां कयेकूम्ह मनू म्हसीधुंकल धासें वयात ज्वनेत्यनागु खँ प्रहरीं धाःगु दु ।