सहकारी चेसय् सजिन एकल अग्रता

यल – ताम्रकार समाज व ललितपुर स्पोर्टस क्लबया मंकाः ग्वसालय् न्ह्यानाच्वंगु न्हय्क्वःगु गणेशमान सिंह स्मृति सहकारी कप बुद्धिचालया प्यंगूगु व न्यागूगु चरणया कासा क्वचाःगु दु ।अन्तर्राष्ट्रिय सहकारी दिवसया लसताय् लाकाः जुयाच्वंगु बुद्धिचाल कासाय् न्यागूगु चरणया कासा क्वचाःगु ईतकया दुने जनता सहकारी थेच्वया सजिन महर्जन दकलय् अप्वः ५ अंक कयाः शीर्ष स्थानय् लानाच्वंगु दु ।

सजिनं न्यागूगु चरणया कासाय् रिजेन्द्र राजभण्डारीयात बुकाः ५ अंकया अग्रता काःगु खः । पूर्व सहकारी विजेता सजिनं थ्व स्वयां न्ह्यः राजन पुरीयात बुकूगु खः । सजिनलिसे पराजय फःम्ह सुनागुथि बहुउद्देश्यीय सहकारीया एफएमरिजेन्द्र शीर्ष निगूगु थासय् यथावत दु ।

रिजेन्द्रलिसें मेम्ह एफएम मनिष हमाल, एफएम रुपेश जयसवाल, सिएम कृष्ण थापा, सिएम केशव श्रेष्ठ, सिएम क्षितिज भण्डारी, सिएम मिलन लामा, बद्रीलाल नेपाली, सुश्रृत दाहाल, सुमन राई, राजन पुरी सकलें नकआउट चरणय् दुहां वंगु दु ।

सर्वाधिक पुरस्कार राशीया कासाय् मुक्कं ४२ म्ह कासामिपिंसं ब्वति कयाच्वंगु कासाया विजेतां यामाहा सलुटो मोटरसाइकल प्राप्त याइगु ग्वसाः खलकं जानकारी बिउगु दु । अथे हे कासामिपिंसं मुक्कं न्यागू लाख न्यय्द्वः तका दांया पुरस्कार नं प्राप्त याइ ।

थ्व हे झ्वलय् जिल्ला सहकारी संघया संचालकद्वय शशीधर पोखरेलं न्हापांगु व विनोद डंगोलं निगूगु चरणया कासा शुरु यासें अन्तर्राष्ट्रिय सहकारी दिवस मूल समारोह समितिया ज्याझ्वलय् न्ह्याबलें नं सहकारी चेस कासाया चर्चा जुया वयाच्वंगु जानकारीइ बियादिल । थनया जावलाख्यःस्थित ताम्रकार समाजया भवनय् जुयाच्वंगु कासाय् आः लिपांगु निगू चरणया कासा जक ल्यं दनि ।