कांग्रेसय् ल्याय्म्ह पुस्ताया मुद्दा पराजित

येँ (नेपालभाषा टाइम्स)( नेपाली कांग्रेसय् न्हूगु नेतृत्वयात सत्ता लःल्हायेगु मुद्दा पराजित जूगु दु । पार्टीया संसदीय दलया नेता ल्ययेगु लागिं म्हिगः जूगु चुनावय् ल्याय्म्ह नेता गगन थापायात प्रधानमन्त्री शेरबहादुर देउवां बुका बिउगु खः । थापां आः सत्ता सञ्चालनया मुद्दा न्हूगु पुस्तायात बीमाः धइगु एजेण्डा दयेकाः दलया नेता पदय् उम्मेदवारी बियादीगु खः ।

चुनावय् थापायात मुक्कं २५ वःगु खःसा देउवायात ६४ मत वःगु खः । थापायात शुरुइ भोट बी धाःपिं सांसदतय्सं तकं लिपा मबिउगु खँ धाःगु दु । आः भोट मबिउपिं सांसदत सु सु खः व उमिसं छाय् भोट मबिल धकाः छानबिन यायेगु खँ गगन क्याम्पं धाःगु दु ।

थःत भोट बी धाःपिं सांसदतय्त देउवा क्याम्पं प्रलोभन बियाः थःपाखे सालाकातःगु अनुमान गगन पुचलं याःगु दु । गगनयात शेखर कोइराला, विश्वप्रकाश शर्मा, प्रदिप पौडेल थेंज्याःपिं हस्तीतय्सं भोट बिउगु खःसां वय्कलं त्याके धाःसा मफुत ।

दलया चुनावय् पराजित जुइवं गगन थापा व विश्वप्रकाश निम्हेस्यां नं आः गठन जुइगु सरकारय् थःपिं मन्त्रीया रुपय् सहभागी मजुइगु धकाः घोषणा यानादीगु दु । उकिया पलेसा बांलाःगु ज्या यायेगु लागिं पार्टीयात खबरदारी यानाच्वनेगु खँ नं वय्कःपिंसं कनादीगु दु ।

गगन थापाया पराजय लिपा नेपाली कांग्रेस दुने युवा पुस्तायात सत्ता त्वःतेगु धकाः वःगु मुद्दायात आःयात बन्द जूगु खँ धाःगु दु । कांग्रेस दुने ल्याय्म्ह पुस्तायात सत्ता त्वःतेगु थ्व मुद्दा पराजित जूगुलिं उकिया लिच्वः मेमेगु पार्टीइ नं लाः वनीगु अनुमान यानाहःगु दु ।