भारतीय सिरपया कारणं उज्बेकिस्तानय् १८ म्ह मस्त सित
एजेन्सी÷ उज्वेकिस्तानया स्वास्थ्य मन्त्रालयं भारतय् दयेकूगु सिरपया कारणं १८ म्ह मस्त सीगु धाःगु दु । स्वास्थ्य मन्त्रालयं बिउगु जानकरीकथं भारतय् दयेकूगु डक–१ म्याक नांयागु सिरपं मस्त सीगु खः । सिरपया परिक्षण यायेगु झ्वलय् सिरपय् एथिलिन ग्लाइकोन नांयाःगु विषाक्त पदार्थ लूगु अन स्वास्थ्य मन्त्रालयं धाःगु दु ।
छुं ई न्ह्यः गाम्बियाय् नं भारतय् दयेकूगु सिरपया कारणं ७० म्ह मस्त सीगु खः । भारतया स्वास्थ्य मन्त्रालयं थ्व विषययात कयाः प्रतिक्रिया बिउगु मदुनि ।
समाचार सस्था रोयटर्सयाकथं भारतया स्वास्थ्य मन्त्रालयं थ्व विषययात कयाः जाँच यानाच्वंगु दु । भारतया नोएडाय् च्वंगु वासः दयेकूगु कम्पनी मेरियन बायोटेकं नं छुं लिसः बिउगु मदुनि । विश्व स्वास्थ्य संगठनं उज्वेकिस्तानया स्वास्थ्य विभागय् स्वापू तयाः घटनाया अनुसन्धानया निंतिं ग्वाहालि यायेगु धाःगु दु । मस्त सीगु ‘डक–१ म्याक’ नांया सिरप मुसुया वासः खः ।
LEAVE YOUR COMMENTS