धरहराय् पसः थुनेत डोजर

येँ (नेपालभाषा टाइम्स) – धराहराया दक्षिणपाखे च्वंगु बजाः म्हिगः थुनेत म्हिगः डोजेर चले याःगु दु । बजाः थुनेगु तयारी याःसां अन पसः तयाच्वंपिंसं ई फ्वनेवं थुनेगु ज्या धाःसा आःयात दिकूगु दु । म्हिगः स्थानीय न्यागू क्लबं धरहराया दक्षिणपाखे च्वंगु टहरा थुनेमाः धासें नगरपालिकाय् निवेदन बिउगु खःसा टहरा थुनेगु निंतिं येँ महानगरपालिका, जनसेवा प्रहरी वःगु खः । तर अन पसः तयाच्वंपिंसं तत्काल थुने दइ मखु धकाः अवरोध यायेवं म्हिगः थुनेगु ज्या धाःसा मजुल ।

गुथि संस्थानया उगु जग्गाय् संस्थानं टेन्डर आह्वान यानाः पसः तयेकेगु ज्या याःगु खः । न्हापा उगु थासय् सतः दुगु धासें पसः कवः मखु बरु सतः दयेकेमाः धासें स्थानीय क्लबं पसः चीकेमाःगु माग यानाच्वंगु खः । गुथिं संस्थानं थ्व स्वयां न्हापा नं उगु थासय् भवन दयेकेगु योजना हःगु खःसा स्थानीय जनतां विरोध यायेवं भवन दयेकेगु ज्या स्थगित जूगु खः । वयां लिपा उगु थासय् थीथी सामग्रीया बजाः दयेकेगु ज्या याःगु खः ।