बुद्ध शिक्षा अध्ययन यायेत विदेशीत नेपाः वयेमाःथाय् अःखः जुयाच्वन – प्रमुख शाक्य
यल – थनया शंखम्वलय् च्वंगु अन्तर्राष्ट्रिय बौद्ध भावना केन्द्रय् प्रतिस्थापना यानातःगु बुद्ध मूर्तिया अनावरण याःगु दु । येँ महानगरपालिकाया प्रमुख विद्यासुन्दर शाक्यं केन्द्रया धम्म हलय् प्रतिस्थापन यानातःगु ध्यान मुद्राया भगवान बुद्धया मूर्ति अनावरण यानादीगु खः ।
भिक्षु इन्दक स्थविरपाखें शील प्रदान यानाबिज्याःगु ज्याझ्वलय् भिक्षु महासंघपाखें बुद्धाभिषेक (मंगल पाठ)लिसें थेरवाद बौद्ध पम्पराकथं बुद्ध पुजा व धर्मदेशना नं जूगु खः ।
बुद्ध मूर्ति अनावरणलिपा ज्याझ्वलय् नवासें येँ महानगर प्रमुख शाक्यं भगवान बुद्ध नेपालय् जन्म जूगु खःसां आपालं विहारत विदेशी ग्वाहालिं निर्माण जुयाच्वंगु खँय् थःत दुःख ताःगु खँ कनादिल । वय्कलं नेपाः बुद्ध जन्म जूगु देय् जूगुलिं विदेशीत बुद्ध शिक्षा अध्ययनया निंतिं नेपाः वयेमाःगु थासय् उकिया अःखः नेपाःमित विदेशय् वनाः बुद्ध शिक्षा अध्ययन याः वनेमाःगु विडम्बना जूगु खँ धयादिल ।
‘बुद्ध नेपालय् जन्म जुयाबिज्यात, तर विहारत दक्वं मेमेगु देय्या ग्वाहालिं निर्माण जुयाच्वन । विहार सुनां दयेकूगु धकाः न्यन धाःसा गुगुं श्रीलंका, गुगुं थाइल्याड, गुगुं जापान आदि देशं दयेका बिउगु धइगु लिसः वइ । नेपाःया नां म्हो जक वयेगु याः’, वय्कलं धयादिल, ‘थःगु नेतृत्वय् जनप्रतिनिधित निर्वाचित जुया वयेधुंकाः दातातय् ग्वाहालिपाखें जक निर्माण जुयाच्वंगु परम्परागत नेपाली वज्रयान विहार निर्माणय् ग्वाहालि यानाच्वनागु दु ।’
बुद्धया ज्ञान, आदर्श व वसपोलया जन्मभूमि लुम्बिनीया पहिचान ल्यंका तयेत राज्यकोषपाखें लगानी अप्वयेकाच्वंगु नं वय्कलं धयादिल । महानगरपालिकां लुम्बिनी दयेकाच्वंगु नेपाःया मौलिक शैलीया विहार दयेकेत ग्वाहालि यानाच्वनागु नापं येँया ५ वडा नरलय् विहार व २८ वडाय् बुद्ध विहार निर्माण ग्वाहालि यानाच्वनागु नापं मेमेगु थासय् नं विहारयात ग्वाहालि यानाच्वनागु खँ कनादिल ।
थःपिं स्थानीय सरकारय् वयेधुंकाः महानगरपाखें आपालं बहाः बहीया जिर्णोद्वार यायेगु नापं पुनःनिर्माण यायेगु ज्या जुयाच्वंगु खँ कनादिसें वय्कलं गुलिखेया ज्या क्वचायेधुंकूगु व गुलिखे थाय्या निंतिं चालु आर्थिक दँय् नं बजेट विनियोजन यानागु जानकारी बियादिल ।
केन्द्रय् प्रतिस्थापन याःगु बुद्ध मूर्ति उपासक बाबुकाजी शाक्यं थः दिवंगत मांअबुनापं जहान व कायया नामं दान यानादीगु खः । उगु इलय् प्रमुख शाक्यं महानगरया आर्थिक ग्वाहालिपाखें निर्माण जूगु भवन व धम्म हलया नं निरीक्षण यानादीगु खः ।
LEAVE YOUR COMMENTS