फोहोर वाइपिंत ५० द्वः बं

आः येँय् गुट्खा, चाउचाउ, चकलेटया खोल वांछ्वये मदु

येँ – येँ महानगरपालिकां आः छुं न्हिं लिपा हे बिस्कुट, चाउचाउ, पानपराग, चकलेट, गुट्खा नयाः उकिया भ्वं लाथेपाथे वांछ्वइपिंत कारबाही यायेगु तयारी यानाच्वंगु दु । कामनपां छुं न्हि लिपा अज्याःगु नसा ज्वलंया खोल लाथेपाथे वांछ्वइपिंत ५०द्वः तका जरिवाना यायेगु व्यवस्था यायेत्यंगु खः ।

मनपा वातावरण विभागया प्रमुख हरिकुमार श्रेष्ठया कथं न्हापांगु चरणय् दरवारमार्ग, रत्नपार्क, शहिदगेट, पुतली सतक व बागबजार क्षेत्रय् अज्याःगु व्यवस्था लागू जुइ । मनपां थुकियात पाइलट प्रोजेक्टया रुपय् न्ह्यःने न्ह्याकेगु तयारी यानाच्वंगु दु । थुगु प्रोजेक्ट सफल जुल धाःसा मनूत अप्वः जुइगु मेगु थासय् नं विस्तार याना यंकी ।

थुकिया निंतिं येँ मनपां सडक किनाराय् माक्व फोहोरया डष्टवीन नं व्यवस्था यायेत्यंगु दु । अथेहे पसः थुवाःयात नं थःगु पसः न्ह्यःने तयेगु डष्टवीनया उचित उपयोगया निंतिं इनाप यायेगु खँ धाःगु दु । थुगु अभियानया निंतिं व्यापक मात्राय् जनचेतना थनेगु तयारी जुयाच्वंगु दु । मनपाया थुगु अभियानयात तेरे मयाइपिंत कानून कथं कारबाही यायेगु खँ नं श्रेष्ठं धयादीगु दु ।

ड्राइफुड, चकलेट, बिस्कुटया खोल, चुरोट आदिया बट्टां सतक तसकं फोहोर जुयाच्वंगु व उकिं यानाः सतकय् च्वंगु धः बन्द जुइगु व वा वइबलय् सतक छपुं लःया लखं जाइगु अवस्था जुयाच्वंगु कारणं अभियान हे न्ह्याकेमाःगु खँ प्रमुख श्रेष्ठं कनादीगु दु । कानून कार्यान्वयनय् वयेधुंकाः उकिया उल्लंघन याइपिंत आः ५० द्वः तकाया जरिवाना यायेगु खँ नं वय्कलं कनादीगु दु ।

सम्बन्धित बुखँ

LEAVE YOUR COMMENTS