चाबही–सक्व सतकया अवस्था

स्वनिगःया सतक चर्चा कि त बर्खांया इलय् जुइ कि मखुसा सुख्खा मौसमया इलय् जुइगु बर्खां वा वइबलय् ध्यातः व सुख्खा मौसमय् धुफ्वं दनीगु जुइवं थनया सतकया अवस्था क्यनाः सकसिनं आलोचना यायेगु यानाहइ । थुकिया निंतिं चाबही–सक्व सतकखण्ड छगू दसू जुया बिउगु दु ।

स्वनिगःया छगू मुख्य केन्द्र विन्दुया रुपय् म्हसीया वयाच्वंगु चाबहिलिं सक्वतक वनेगु सतकया दूरावस्थाया कारणं पर्यटन व्यवसायय् म्होति वःगु व्यवसायीतय्सं धाःगु दु । सक्व सतकखण्ड जुयाः थ्यनीगु पर्यटकीयस्थल नगरकोट, मिनी इलामया नामं परिचित सिन्धुपाल्चोकया भोटेचौरस्थित च्या बगान, गुँभ्वय्या हब जुयाच्वंगु जहरसिंहपौवा, झुले लगायतया पर्यटकीय क्षेत्र सक्व जुयाः थ्यनीगु थाय् खः ।

‘सतकया अवस्था तसकं दयनीय दु’, शंखरापुर प्याराग्लाइडिंगया पाइलट अजय चौलागाइं धयादी, ‘सतकया गाः, ध्याचः व दूया कारणं पर्यटकत हैरान जुयाच्वंगु दु । सतकया कारणं प्याराग्लाइडिंगया निंतिं वइपिं पर्यटकतय्सं नं गाक्कं हीमी चायेगु यानाच्वंगु दु ।’ थाय्थासय् सतक स्यनाः गाः वनाच्वंगु, ध्याचः व धुलं यानाः अःपुक यात्रा याये फइगु अवस्था मदु ।

सतकया थाय्थासय् लानातःगु चागः नं छरपष्ट जुयाच्वंगु दु । चौलागाइं धयादी, ‘पर्यटक म्हो जुइगु मुख्य कारण सतक खः ।’ हिमाल स्वस्वं प्याराग्लाइडिंगया आनन्द कायेत वइपिं पर्यटकया न्हापांगु रोजाइलय् लाःगु थाय् जहरसिंहपौवा जूसां नं सतकया दूरावस्थाया कारणं इपिं मेथाय् हे वनेगु यानाच्वंगु दु ।

सतकया हे अवस्था स्वयाः हेरी ट्राभल एजेन्सीया संचालकं जहरसिंहपौवा वइपिं पर्यटकतय्त मेथाय् हे छ्वयेगु यानाच्वंगु दु । पर्यटक व होटल व्यवसायीयाकथं चाबहिलिं जोरपाटी, सक्व जुयाः नगरकोट व सक्व नगरपालिकाया थीथी पर्यटकीयस्थल थ्यनीगु सतकया कारणं पर्यटकया ल्याः ह्वात्त हे कुहां वःगु दु ।

जहरसिंहपौवास्थित होटल हेभेन हिलया संचालक रामप्रसाद तिमल्सिना धयादी, ‘पर्यटकया निंतिं जुइगु गाडी सतक दथुया गालय् लानाः अनहे दी । मोटरसाइकल चुलुइगु, पल्टे जुइगु व क्वःमदःगु दिं हे दइमखु । सतकया ममर्तसम्भार याना बिउगुलिं पर्यटन व्यवसायय् ¥हास वयाच्वंगु दु ।

कच्ची सतकया धू व ध्यातःया कारणं पर्यटकत नं वये माने जुयाच्वंगु मदु ।’सतक निर्माण कम्पनी व सरकारी निकायया तःक्वः तःक्वः ध्यानाकर्षण याःसां नं सुनुवाई मजुयाच्वंगु वय्कःया धापू दु । वंगु स्वदँ थुखे खास्ति–जोरपाटी–सक्व सतकखण्डया अवस्था तसकं दयनीय जुयाच्वंगु दु ।

वा वल धाःसा ध्याचः व निभाः त्वइगु इलय् सतक छगुलिं धुफ्वः दनाच्वनी । सतक हे खने मदयेक ब्वइगु धुलं स्थानीयवासी जक मखसे नेपाः चाःहिलेत वइपिं पर्यटकं तकं सास्ती नयेमालाच्वंगु दु । निभाः त्वइगु इलय् धुफ्वः दनाः छुं हे खने दइमखु । सतकय् दुगु गाःतकं वारपार यायेत थाकुइगु स्थानीयवासीतय् धापू दु ।

विश्व सम्पदाया धलखय् दुथ्यानाच्वंगु खास्ति चैत्य व ऐतिहासिक धरोहरया रुपय् दुगु सक्वतकं थ्व हे सतकखण्ड दुने लाः । सरकारं २०७२ सालय् चाःबहिलिं सक्वतक २२ मिटर तब्या यानाः प्यंगू लेनया सतक दयेकेगु योजना हःगु खः । काठमाडौं उपत्यका सतक विस्तार आयोजनां २०७२ जेठ महिनाय् सतकखण्डया निर्माणया निंतिं बोलपत्र आह्वान यानाः असोजय् प्यंगू कम्पनीयात निर्माण ठेक्का बिउगु खः ।

कुल ११ दशमलव ४६ मिटर हाकः दुगु सतकखण्डय् प्यंगू कम्पनीं इलय् निर्माण सिधयेके मफइगु जुइवं थप छगू मेगु कम्पनीयात सतक विस्तारया निंतिं जिम्मा बिउगु दु । काठमाडौं उपत्यका सतक विस्तार आयोजनाया सूचना अधिकारी विश्वविजयलाल श्रेष्ठया कथं हालय् सर्वोच्च अदालतं सतकय् जग्गा लाःपिंत मुआब्जा बीमाःगु आदेश बिउगु दु ।

मुआब्जा प्रक्रियाय् वनेमाःगुलिं छुं ई लिपा लाःवंगु श्रेष्ठं धयादिल । ‘विवादास्पद थासय् स्वयां मेमेगु क्षेत्रय् निरन्तर ज्या जुयाच्वंगु दु । आः याकन सतक निर्माण जुइ’ वय्कलं धयादिल । निश्चित ई मिले याना वइपिं पर्यटकत लँय् हे ई बीगु जुइवं मेगु थासय् वनेत बाध्य जुयाच्वंगु दु । व्यवसायीं सतक निर्माण फक्व याकनं यायेत इनाप याःगु दु ।

 

सम्बन्धित बुखँ

LEAVE YOUR COMMENTS