शपथ ग्रहणया भाषा बारे ज्ञापनपौ

येँ (नेपालभाषा टाइम्स)- राष्ट्रिय जनगणना तथा भाषा आयोगं सूचीकरण याःगु बाहेक मधेश प्रदेशय् मेगु भाषां शपथ ग्रहण मयाकेत माग यासें मधेश प्रदेश संसद सचिवालयया ध्यानाकर्षया याःगु दु । थीथी भाषा, साहित्य, कला संस्कृतिया क्षेत्रय् ज्या यानाच्वंगु गुंगू संस्थां उगु माग याःगु खः ।

मंकाः ध्यानाकर्षण पतिइ नेपाल सरकारया आधिकारिक दस्तावेजं म्ह हे मसिउगु मधेशी भाषाय् शपथ ग्रहण याकेबियाः संघीय संसद सचिवालयं देशय् भाषा विवाद ब्वलंकूगु द्वपं नं बियातःगु दु । उकी धयातःगु दु, ‘संघीय संसद सचिवालयया थज्याःगु क्रियाकलापं देशय् ल्हाइगु १२३ गू भाषाभाषीया म्हसीकाय् घाः लाःगु दु ।’

ध्यानाकर्षण पतिइ छुं संघीय सांसदतय्सं उकुन्हु याःगु शपथ ग्रहण बदर यानाः हाकनं शपथ ग्रहण याकेमाःगु माग नं याःगु दु । पुस ७ गते जनमत पार्टीया अध्यक्ष सीके
राउतसहित स्वम्ह सांसदतय्सं ‘मधेशी भाषां’ शपथ काःगु खः ।