बिमस्टेकया इलय् एअरपोर्ट बन्द

येँ – वइगु बिहीवाः येँया त्रिभुवन अन्तर्राष्ट्रिय विमानस्थल निघौत्याया निंतिं पूर्ण रुपं बन्द याइगु जूगु दु । सुथय् ८ निसें साढे १० बजे तक विमानस्थलय् अति विशिष्ट व्यक्तित्वत च्वना वइगु विमानत अवतरण याइगु जूगुलिं मेगु नियमित उडानत मयाकीगु जूगु खः । बिमस्टेक शिखर सम्मेलनय् ब्वति कायेत वइपिं थीथी राष्ट्रया प्रमुख व प्रतिनिधितय् सुरक्षायात ध्यानय् तयाः विमानस्थल बन्द यायेत्यंगु खः ।

उगु इलय् सर्वसाधारण जनता नं विमानस्थलय् दुहां वने दइ मखु । विमानस्थल प्रमुख राजकुमार क्षेत्रीं क्षेत्रीं भदौ १४ व १५ गते विमानस्थल नीप्यघौ हे खुला याना तयेगु खँ नं कनादिल । थौंकन्हय् न्हिं २१ घौ तक विमानस्थल चालाच्वंगु दु । थ्वहे झ्वलय् सरकारं १४ व १५ गते स्वनिगलय् सार्वजनिक व निजी यातायात नं जोरबिजोर प्रणाली कथं चले यायेगु निर्णय याःगु दु ।

बिमस्टेक सम्मेलनय् ब्वति कायेत वइपिं राष्ट्र प्रमुखया सवारीया इलय् छुं कथंया समस्या मवयेमा धकाः थुकथं जोरबिजोर प्रणाली लागू यायेत्यंगु खः । तर राष्ट्र प्रमुखया सवारीया इलय् पूरा सतक हे खाली यायेगु खः वा मखु धइगु बारे धाःसा निर्णय मजूनिगु खँ धाःगु दु ।
स्वनिगलं पिहां वनीगु सवारी साधन धाःसा सुथय् ६ बजे न्ह्यः हे पिहां वनेमाःगु व्यवस्था याःगु दु ।

विशेष यानाः भदौ १४ गते ट्राफिक व्यवस्थापन याये तसकं थाकुइगु खँ धाःगु दु । वकुन्हु थाइल्यान्डया प्रधानमन्त्री व भारतीय प्रधानमन्त्री नं थ्यंकः वइ । वकुन्हु राष्ट्रपति विद्यादेवी भण्डारीं ज्यःनाः भ्वय्या आयोजना यानातःगु दुसा निम्हं प्रधानमन्त्री विमानस्थलं तप्यंकं शितल निवास व वयां लिपा होटल वनीगु जूगुलिं ट्राफिक व्यवस्था यायेत थाकुइगु खनेदुगु खँ धाःगु दु ।