झिंप्यम्ह रोहिंग्या शरणार्थी ज्वन

येँ -येँया बौद्धय् झिंप्यम्ह रोहिंग्या शरणार्थीत ज्वंगु दु । उपिं अवैध रुपं नेपाः दुहां वःगु खँ धाःगु दु । प्रहरीया कथं रोहिंग्या शरणार्थी बंगलादेशं स्थलमार्ग जुयाः झापाया काँकडभिट्टां नेपाः दुहां वःगु खःसा दलालया माध्यमं निन्हु न्ह्यः जक बौद्ध थ्यंकः वःगु खः । वर्माय् रोहिंग्या समुदाययात दमन जुइगु क्रम अप्वयेवं विस्थापित जूपिं रोहिंग्या बंगलादेश जुयाः नेपाः वयेगु क्रम अप्वया वनाच्वंगु दु ।

रोहिंग्यात नेपालय् शरणार्थीया रुपय् च्वनेगु योजना कथं वःगु व उमित मानव तस्करं सेटिङ यानाः नेपाः हःगु अनुमान याःगु दु । प्रहरीं उमित नेपाः तक हयेगु ज्याय् दुथ्याःम्ह बंगलादेशी नागरिकयात नं ज्वंगु दु । थौंकन्हय् निसः स्वयां अप्वः रोहिंग्या शरणार्थीत येँया कपनय् च्वनाच्वंगु दु । उमिसं अन थीथी कथंया बिकृति ब्वलंकेगु ज्या यानाच्वंगु दु ।