
येँ (नेपालभाषा टाइम्स)- राष्ट्रिय स्वतन्त्र पार्टीं गृहमन्त्री थःपिंत हे माःगु अडान काःगु दु । रास्वपाया सभापति रवि लामिछानें म्हिगः प्रधानमन्त्री पुष्पकमल दाहालयात नापलासें गृह मन्त्रालयया नेतृत्व थःगु पार्टीयात बीत माग यानादीगु खः ।
तर प्रधानमन्त्री दाहालं लामिछानेया नागरिकता विवाद समाधान जूसां पासपोर्टया समस्या कायम दनि धासें धासें हथाय् मचायेत इनाप यानादीगु खँ धाःगु दु । प्रम दाहालं लामिछानेया मामिलाय् कानुनी खँ छु जुइ छकः सल्लाह यायेमाली, कन्हय् वनाः समस्या मजुइमा धयादीगु खः । सभापति लामिछानें थःगु पार्टीयात गृह मन्त्रालय मबिल धाःसा सरकारयात बियातःगु समर्थन लित कायेगु ख्याच्वः समेत बियादीगु दु ।
थ्वहे झ्वलय् प्रधानमन्त्री दाहालं लामिछोनया मुद्दाय् सर्वोच्च अदालतया पूर्णपाठ मवःतले गृह मन्त्रालय बारे छुं नं कथं निर्णय मयायेगु खँ धयादीगु दु । म्हिगः पार्टीया पदाधिकारी बैठकय् वय्कलं गृह मन्त्रालय बारे तत्काल निर्णय मयायेगु जानकारी बियादीगु खः । थ्व स्वयां न्ह्यः पार्टीया पदाधिकारी बैठकय् गृह मन्त्रालय माओवादीं हे कायेमाःगु सः थ्वःगु खः । लामिछाने पदमुक्त जुइधुंकाः गृह मन्त्रालय प्रधानमन्त्री स्वय्मं कयातःगु दु ।
थःत प्रधानमन्त्री दाहालं गृह मन्त्रालय मबीगु संकेत वयेवं रास्वपाया अध्यक्ष लामिछानें म्हिगः एमाले अध्यक्ष केपी ओलीयात नापलानादीगु दु । ओली निवास बालकोट वनाः वय्कलं सत्ता गठबन्धनय् जूगु सहमति कथं थःगु पार्टीयात गृह मन्त्रालय बीमाः धइगु धापू तयादीगु खः । लिसलय् अध्यक्ष ओलीं थः नं सहमति कार्यान्वयन जुइमाःगु पक्षय् दुगु खँ धयादीगु खः । एमालें रवि लामिछानेयात हे गृह मन्त्री दयेकि धकाः प्रम दाहालयात धायेधुंकूगु दुसां प्रमं धाःसा उकियात न्यनाच्वंगु मदु ।
लामिछाने विरुद्ध उजुरी दर्ता मयाः
राष्ट्रिय स्वतन्त्र पार्टीया सभापति रवि लामिछाने विरुद्ध लाःगु जाहेरी दर्ता यायेत प्रहरीं अस्वीकार याःगु दु । खारेज जूगु नागरिकताया आधारय् राहदानी काःगु धासें राहदानी ऐन कथं लामिछानेयात कारबाही यायेमाः धासें युवराज पौडेल जाहेरी ज्वनाः येँया प्रहरी परिसरय् वंगु खःसां प्रहरीं दर्ता यायेत अस्वीकार याःगु खः ।
प्रहरीं नागरिकताबारे सर्वोच्च अदालतं याःगु फैसलाया पूर्णपाठ मवःगुलिं जाहेरी दर्ता मयानागु खँ धाःगु दु । उकथं हे पौडेलं लामिछाने विरुद्ध अध्यागमन विभागय् नं जाहेरी तःगु खःसा अन नं दर्ता यायेत अस्वीकार याःगु दु । राहदानी ऐनया दफा २१ (क) कथं मखुगु विवरण बियाः राहदानी काल धाःसा दछिनिसें स्वदँ तक कैद वा निगूनिसें न्यागू लाख तक जरिवाना वा निगुलिं सजाय जुइगु व्यवस्था दु ।
अध्यागमन विभागय् बिउगु उजुरीइ लामिछानें ‘जाली राहदानी’ छ्यःगु धासें अध्यागमन ऐन कथं छानविन व कारबाही यायेत माग यानातःगु दु । पौडेल लामिछानेया नागरिकतायात कयाः रिट बिउपिं निम्ह मध्ये छम्ह खः ।
LEAVE YOUR COMMENTS