कार्टुनिस्ट सायमिया पदक मकायेगु निर्णययात यक्वसिया समर्थन

येँ -कार्टुनिस्ट रविन साय्मिं सरकारं बिउगु पदक मकायेगु धकाः याःगु निर्णययात यक्वस्यां समर्थन याःगु दु । कार्टुनिस्ट साय्मियात संविधान दिवसया लसताय् सरकारं ‘प्रवल जनसेवा श्री’ पदक पाखें विभुषित यायेगु क्वःछिउगु खः, तर वय्कलं सामाजिक सञ्जालय् ‘आःयात विभुषण ग्रहण मयायेगु निर्णय याना’ धकाः च्वयाः विभुषणयात बहिष्कार यानादीगु खः ।

सामाजिक सञ्जालय् वय्कलं विभुषण मकायेगु निर्णय याना धकाः च्वयादीगुयात यक्वस्यां समर्थन याःगु दु । वय्कःया निर्णयय् समर्थन यानादीपिं यक्वसिनं सरकारं सम्मान कथं बीगु थज्याःगु पदकया गरिमा हे मदयेधुंकूगुलिं थज्याःगु पदक मकायेगु हे बांलाःगु आशय प्वंकाच्वंगु दु ।

कार्टुनिस्ट साय्मिं सरकारं बीगु पदक दलया भागबन्दा कथं बीगु याना वयाच्वंगु, तर थः छम्ह स्वतन्त्र पत्रकार जूगु ल्याखं थज्याःगु पदक काये मल्वःगुलिं मकायेगु निर्णय यानागु खँ धयादीगु दु ।
सरकारं संविधान दिवसया लसताय् लाकाः गुसलं मल्याक थीथी व्यक्तितय्त थीथी पदकं विभूषित यायेत्यंगु दु । थथे पदकं विभुषित जुइपिं मध्ये एकीकृत माओवादी अध्यक्ष पुष्पकमल दाहालया कलाः सीता दाहाल, नकतिनि गठन जूगु दल नेकपा समाजवादीया अध्यक्ष माधव नेपालया अबु मंगलकुमार उपाध्याय नां तकं लानाच्वंगु दु । दाहलयात राजनीतिक अभियन्ताया ल्याखं प्रसिद्ध प्रवल जनसेवा श्री पदक बीत्यंगु खः । मदयेधुंकूम्ह उपाध्याययात साहित्यकारया ल्याखं प्रवल जनसेवा श्री पदक बीत्यंगु खः ।

अथेहे ईकागज डट कमया सम्पादक वरिष्ठ पत्रकार हरिबहादुर थापां थःत बिइगु धाःगु प्रवल जनसेवा श्री पदक मकायेगु घोषणा यानादीगु दु । वय्कलं नं सामाजिक सञ्जालय् ‘प्रवल जनसेवा श्री’ पदक बीगु नांधलखय् झिंनिगूगु नम्बरय् नां दुम्ह जिं पदक अस्वीकार यायेगु निर्णय याना धकाः च्वयादीगु दु । वय्कलं पदक वितरण विधि व पारदर्शिताय् खुल्ला बहस जुइमाः धासें पदक अस्वीकार याःगु खः ।