ख्वपय् बिस्काः जात्रा सुरु

ख्वप (रासस)- च्याचा, गुन्हु तक हनीगु ख्वपया बिस्काः जात्रा म्हिगः थाैं मंगलवाः निसें सुरु जुल । जात्राया न्हापांगु न्हि कुन्हु सुथंनिसें तौमधिइ दयेकातःगु भैलःद्यःया खः पुज्याइपिनि हुलमूल जुल । सुथय् नित्य पुजा धुंकाः गुथि संस्थान प्रमुख व सिँकःमि नाइकें सरकारी पुजा यायेधुंकाः सर्वसाधारणयात खः पुज्याकूगु खः ।

थाैं हे न्हिनय्निसें द्यः सालेगु नं सुरु जूगु खः । भलःद्यःया रथयात थःने, क्वःने यानाः सालेगु जूगु खः । रथयात थःने फक्व थःने, क्वःने फक्व क्वःने सालेगु यानाः लिपा गःहितिइ थ्यंकेमाःगु चलन दु ।
तान्त्रिक विधिकथं गुथि संस्थानं हःगु सरकारी पुजा लिपा भैलःद्यः व बेतालयात रथय् बिज्याकेधुंकाः हनुमानध्वाखां जुजुया प्रतीक कथं हःगु खडग व निशान तयेधुंकाः रथ सालेगु सुरु जूगु खः ।

वइगु चैत मसान्त कुन्हु ल्यःसिंख्यलय् गुथि पुजा लिपा यःसिं थनेगु ज्या जुइ । थुगुसी सनिलय् ५ बजे यःसिं थनेगु क्वःछिनातःगु दु । थ्वयां कन्हय् कुन्हु नं सनिलय ५ बजे पाखे यःसिं क्वःथइ । यःसिं क्वःथये धुंकाः नं वैशाख ५ गते तक थीथी थासय् भैलःखः सालेगु जात्रा जुयाहे च्वनी ।

ख्वपया सिडिओ रोशनीकुमारी श्रेष्ठं बिस्काः जात्राय् हुलदंगा मजुइमा धकाः सुरक्षा व्यवस्था कडा यानागु खँ धाःगु दु । वय्कलं न्हिनय् ३ बजे रथ सालाः ६ बजे तकया दुने क्वचायेगु कथं ज्या जुयाच्वंगु धयादीगु दु । लिसें प्रहरीं सिसिक्यामरा मार्फत निगरानी यानाच्वंगु खँ नं धयादीगु दु ।