यलय् इको पार्क दयेकेगु तयारी

यल – यल महानगरपालिकां पूच्वया इन्जिनीयरिङ अध्ययन संस्थान, संयुक्त राष्ट्र संघीय भवनया कम्पाउण्ड व जाउलाख्यलय् पर्यवरणी (इकोपार्क) दयेकेगु तयारी याःगु दु ।थुकिया निंतिं महानगरं इन्जिनीयरिङ अध्ययन संस्थानया राणाकालीन मू भवन व राष्ट्र संघीय भवन जःखःया कम्पाउण्डया पःखाः थुनीगु जूगु दु ।

उगु निगू निकायया सहमितिइ हे अनया भौतिक संरचनाय् छुं नं कथंया लिच्वः मलाइ कथं हरियाली यथावत तयाः थप बांलाःगु व आकर्षक इकोपार्क दयेकेगु तयारी महानगरं यानाच्वंगु खँ मेयर चिरिबाबु महर्जनं कनादिल ।महानगरपालिका व प्राथमिक स्वास्थ्य सेवा केन्द्रं मंकाः कथं ग्वसाः ग्वःगु इको सिटी सम्बन्धी ज्याझ्वलय् न्ववायेगु झ्वलय् वय्कलं उगु खँ धयादीगु खः ।

वय्कलं मनपां जग्गा न्यानाः पार्क दयेकेगु सम्भव मदु धासें आः दुगु जमिनयात हे पाय्छि कथं उपयोग यानाः पार्कया रुपय् विकास यायेगु
खँ कनादिल । वय्कलं मनपा दुने आः प्यंगू प्रतिशत जक सार्वजनिक जग्गा ल्यं दनि धासें दुगु जग्गायात उपभोग यायेगु बाहेक थःपिंकें मेगु विकल्प मदुगु खँ कनादिल ।