मरुसतःया सिँ खुया यंकाच्वन

येँ देय्या म्हसीका जुयाच्वंगु मरुसतः पुनःनिर्माण विवादया कारणं ढिलासुस्ती जुयाच्वंगु सकसिनं सिउगु हे खँ खः । मरुसतः पुनःनिर्माण यायेगु बारे पुरातत्व विभाग, येँ महानगरपालिका, राष्ट्रिय पुनःनिर्माण प्राधिकरण व काष्ठमण्डप पुनःनिर्माण अभियानया दथुइ खँ मिले मजुइवं मरुसतः पुनःनिर्माणं गति काये फयाच्वंगु मदु ।
छखे मरुसतः पुनःनिर्माणं गति काये फया च्वंगु मदुसा मेखे मरुसतःया पुलांगु सिँ बेवारिसे अवस्था त्वःता बिउगुलिं खुया यंका च्वंगु दु । मरुसतःया ११०० दँ पुलांगु सिँ बसन्तपुलि लागाय् बेवारिस अवस्थाय् त्वःता तःगुलिं खुया यंकाच्वंगु दु ।
२०७२ सालया विनाशकारी तःभुखाचं पाःताः जुइक दुना वःगु ऐतिहासिक, सांस्कृतिक व पुरातात्विक ल्याखं महत्वपूर्ण मरुसतः,या सिँ महाद्यः पार्वति देगः लागाय् गृह मन्त्रालय अन्तर्गतया समारोह प्रबन्ध फाँया ज्याकू दुगु चुक व भैरवया मूर्ति न्ह्यःने बेवारिसे अवस्थाय् तयातःगु दु ।
विवादया कारणं मरुसतः पुनःनिर्माणं गति काये मफुगुला द हे दु, पुरातात्विक ज्वलं तकं संरक्षण याये मफुगु खँय् स्थानीयवासीतय्सं चिउताः प्वंका हःगु दु ।
मरुसतः पुनःनिर्माण यायेगु सम्बन्धय् राष्ट्रिय पुनःनिर्माण प्राधिकरणं दकलय् न्हापां स्थानीयवासीतय् समितियात व वयां लिपा येँ महाानगरपालिकायात जिम्मा बिउगु खः । येँ मपां मरुसतः पुनःनिर्माण यायेगु खँय् चिउताः क्यनामच्वंगु जक मखु मरुसतः दुना वयाः अन च्वंगु पुरातात्विक, सांस्कृतिक व ऐतिहासिक ल्याखं महत्वपूर्ण सिँ तकं संरक्षण यायेगुपाखे चिउताः क्यना मच्वंगु स्थानीयतय् धापू दु ।
सम्पदा संरक्षण अभियानय् लगे जुया च्वनादीम्ह छम्ह अभियन्ता लिसें स्थानीयवासी सुमना श्रेष्ठं येँ मनपां ऐतिहासिक महत्व दुगु सम्पदा दयेकेगु स्वयां नं कमिसनया कासाय् लगे जुयाच्वंगुलिं मरुसतःया हलंज्वलं संरक्षण यायेगु खँय् ध्यान बियामच्वंगु द्वपं बियादीगु दु ।