च्वमि आनन्दसिद्धि तुलाधर मंत

येँ (नेपालभाषा टाइम्स)- नेपालभाषाया साहित्यकार लिसें बौद्ध उपासक आनन्दसिद्धि तुलाधर मंत । ९० दँ दुम्ह वय्कः वंगु चान्हय् मस्तिष्काघात जुयाः मदुगु खः ।
थौं येँया लुतिइ वय्कःया अन्त्येष्टि याइगु जूगु दु । वय्कलं थःगु अन्त्येष्टि थेरवादी परम्पराकथं यायेगु धकाः छेँजःपिंत धयातःगु जूगुलिं थौं थेरवादी परम्पराकथं वय्कःया अन्त्येष्टि यायेत्यंगु खँ छेँजःपिंसं धाःगु दु ।

छुं ई न्ह्यः तिनि तुलाधरया बाखं सफू ‘लिजः’ पिहां वःगु खः । थ्व बाहेक नं वय्कःया आपालं फुटकर च्वसुत पिहां वयाच्वंगु दु । वय्कः युवा बौद्ध समूहया सल्लाहकार नं खः ।
वय्कःया जहान लिसें छम्ह म्ह्याय् व स्वम्ह कायपिं दी । वय्कःया कायपिं आलोकसिद्धि तुलाधर नांजाःम्ह सम्पदा अभियन्ता खःसा अरुणसिद्धि तुलाधर नेपालभाषा लिसें बुद्ध धर्मया ख्यलय् सक्रिय कार्यकर्ता खः ।

कान्छाम्ह आभूषणसिद्धि तुलाधर चिकित्सक खः । म्ह्याय् दिव्या ताम्राकार नेपालभाषाया नांजाःम्ह बाखं च्वमि खः ।