न्यादँ तक राजधानी सारे मयाइगु

राजधानीया खँ पिहां वयेवं आन्दोलन जुइगु ग्याःचिकु

येँ – थीथी प्रदेशया स्थायी राजधानी गन गन सारे यायेगु धकाः व्यापक चर्चा जुयाच्वंसां अःयात राजधानी सारे यायेगु ज्या मजुइगु खँ सीदुगु दु । छगू प्रदेशया राजधानी सारे यात धाःसा फुक्क हे प्रदेशय् राजधानी सारे यायेगु खँ पिहां वयेफुगु जूगुलिं आःयात राजधानी सारे यायेगु खँयात थि हे मथीगु मनःस्थितिइ सरकार वनाच्वंगु खँ सूत्रं धाःगु दु ।

थौंकन्हय् ४ नम्बर प्रदेश छगू बाहेक मेगु फुक्क हे प्रदेशय् स्थायी राजधानी गन तयेगु धइगु खँय् छगू मत मजुयाः विवाद जुयाच्वंगु दु । ४ नम्बर प्रदेशया राजधानी धाःसा पोखराय् तयेगु खँय् छगू हे मत दु । थौंकन्हय् ३ नम्बर प्रदेशया राजधानी नं हेटौंडां सारे यानाः बनेपा व ख्वपय् तये माली धइगु प्रस्ताव वयाच्वंगु दु ।

उकियात कयाः थ्वहे साउन महिनाय् मतदान समेत याकेगु तयारी जुयाच्वंगु खँ सीदुगु दु ।तर ३ नम्बर प्रदेशया स्थायी राजधानी सारे यायेसातकि मेमेगु प्रदेशय् नं राजधानीया विवाद दना वइ । सूत्रं धाः कथं ३ नम्बर प्रदेशया राजधानी सारे यायेत उलि समस्या मजूसां अनया राजधानी सारे यायेसातकि १ नम्बर, ५ नम्बर प्रदेशया राजधानी विवाद नं दना वइगु सम्भावना दु ।

१ नम्बर प्रदेशया राजधानी गन तयेगु धइगु खँय् तःधंक हे विवाद जुयाच्वंगु दु । अनया अस्थायी राजधानी थौंकन्हय् विराटनगरयात दयेका तःगु दुसां वहे प्रदेशय् लाःगु इटहरी, धरान व धनकुटां नं राजधानी थःथाय् हयेमाः धकाः आन्दोलन यानाच्वंगु दु । अन राजधानीया लागिं जूगु आन्दोलनय् सरकारी गाडी च्याकेगु निसें प्रदेश बन्द यायेगु तकया ज्याझ्वःत जूगु खः ।

उखे ५ नम्बर प्रदेशया राजधानी नं गन तयेगु धइगु खँय् बुटवल व दांगया दथुइ तःधंगु हे विवाद जुयाच्वंगु दु । अन नं थवंथवय् पुत्ला च्याकेगु व बन्द यायेगु तकया ज्याझ्वःत जुइधुंकूगु दु ।

राजधानी थःथाय् तयेमाः धइगु खँयात कयाः देय्या आपालं थासय् छक्वलं प्रदर्शन जुयाः अराजक स्थिति ब्वलनेफुगु अवस्था वःगु जुयाः आः सत्तारुढ पार्टी नेपाल कम्युनिष्ट पार्टीया उच्चस्तरीय नेतातय्सं आःयात स्थिति न्ह्यागु जूसां राजधानी सारे यायेगु ज्या चाहिँ मयाये माली धकाः सहमति दयेकूगु खँ सूत्रं धाःगु दु ।

सूत्रया कथं कम से कम नं थ्व सरकार दत्तले राजधानीया खँ मल्ह्वनेगु बारे सहलह जुयाच्वंगु दु । न्यादँ लिपा परिस्थिति मेगु हे जुइवं अबले हानं थुकिया बारे पुनर्विचार याये माली धइगु खँय् नं नेतातय् दथुइ सहलह जुयाच्वंगु दावी सूत्रं याःगु दु ।थौंकन्हय् अस्थायी राजधानी दयेका तःगु नगरतय्सं नं राजधानी सारे यात धाःसा तःधंगु आन्दोलन याये धकाः ख्याच्वः बियाच्वंगु दु ।