ने. सं. ११४४ कौलाथ्व चौथी -

प्रदेश २ या निंतिं प्यंगू नां प्रस्ताव

मधेश, जानकी, मिथिला–भोजपुरा व मध्य मधेश मध्ये छगू

येँ – प्रदेश नं. २ या निंतिं प्यंगू बिस्कं बिस्कं नां प्रदेशसभाय् दर्ता जूगु दु। सत्तारुढ संघीय समाजवादी पार्टी व राष्ट्रिय जनता पार्टी मंकाः प्रस्ताव दर्ता याःगु दुसा नेपाल कम्युनिष्ट पार्टी व नेपाली कांग्रेसं बिस्कं हे प्रस्ताव दर्ता याःगु दु ।

प्रस्ताव दर्ता यायेगु अन्तिम न्हि कुन्हु ससपा व राजपां मंकाः कथं ‘मधेश प्रदेश’ नां तयेत प्रस्ताव दर्ता याःगु खः । अथेहे नेकपां ‘जानकी’ व कांग्रेसं ‘मिथिला–भोजपुरा’ नांया प्रस्ताव दर्ता याःगु दु। कांग्रेसया छथ्वः सांसदतय्सं धाःसा ‘मध्य मधेश’ नां तयेगु निंतिं मेगु हे प्रस्ताव दर्ता याःगु दु ।

अथेहे स्थायी राजधानीया हकय् नं प्यंगू हे बिस्कं बिस्कं प्रस्ताव दर्ता जूगु दु। ससपा व राजपां जनकपुरधाम मिथिला माध्यमिकी चाःहिलीगु सतक व धनुषाया उत्तर ढल्केबर पूर्व पश्चिम राजमार्गया पूर्वय् च्वंगु कमला खुसि व दक्षिणय् नेपाःया सीमा तकया भागयात स्थायी राजधानी दयेकेमाःगु प्रस्ताव याःगु दु । नेकपां मिथिला परिक्रमा सहित धनुषायात राजधानी कथं प्रस्ताव याःगु दुसा कांग्रेसं जनकपुर उप महानगरपालिका जुइमाःगु प्रस्ताव दर्ता याःगु दु। मेखे वीरगंज महानगरपालिकायात राजधानी यायेमाः धासें वीरगंजया सांसदतय्सं नं मेगु प्रस्ताव दर्ता याःगु दु ।

निगू पार्टीया सांसदतय्सं पार्टीया निर्णय विरुद्ध बिस्कं कथंया प्रस्ताव दर्ता याःगु दु। ससपाया न्हय्म्ह सांसद व कांग्रेसया प्यम्ह सांसदं पार्टीया निर्णय अःखः प्रस्ताव दर्ता याःगु खः । पार्टीया निर्णय अःखः प्रस्ताव दर्ता याःपिं फुक्कं सांसद वीरगञ्जयापिं खः ।

पार्टीया निर्णय अःखः प्रस्ताव दर्ता याःपिं थ्व सासदतय्सं प्रदेशया राजधानी वीरगञ्ज जुइमाः धइगु प्रस्ताव दर्ता याःगु खः । उमित समर्थन याःपिं सांसदत नं उगु हे क्षेत्रयापिं खः । उमिसं वीरगञ्ज महानगरपालिकायात स्थायी राजधानी दयेकेमाःगु प्रस्ताव दर्ता याःगु खः ।