वाइवाइ कारखानाय् यल मनपाया अनुगमन

यल – यल महानगरपालिका ख्वना सैबुइ च्वंगु वाइवाइ चाउचाउया कारखाना व बालकुमारी च्यासलय् च्वंगु हिमालय कलेज अफ इन्जिनियरिङ्गया अनुगमन याःगु दु । तर अनुगमन याः वंपिं यल मनपाया पदाधिकारीपिंसं वाइवाइ चाउचाउया उत्पादक कम्पनी सिजी फुड्सं छुं भ्वँ क्यनेत धाःसा अस्वीकार याःगु दु ।

यल मनपाया आर्थिक विकास समितिं तःतःधंगु व्यापारिक प्रतिष्ठानया अनुगमान यायेगु झ्वलय् मंगलवाः थुपिं निगू संस्थाया अनुगमन याःगु खः । समितिया संयोजक व वडा नं. २१ या वडाअध्यक्ष रविन्द्र महर्जनया नेतृत्वय् वंगु पुचलं कलेज व सिजी फुडस्या कारखाना अनुगमन याःगु खः । मनपाया अनुगमन पुचलं व्यवसाय दर्ता जू मजू, छेँजग्गाया कर पुलातःगु दु मदु निरीक्षण याःगु खः ।

सिजी फुड्सया सैबु कारखानां धाःसा थःपिनि फुक्क भ्वँ केन्द्रीय कार्यालयय् लानाच्वंगु धासें भ्वँ क्यनेत अस्वीकार याःगु खः । मनपाया अनुगमन पुचलं न्हापा हे सुचं बियाः अनुगमनय् वनाः नं भ्वँ क्यनेत अस्वीकार याःगुलिं न्हन्हुया दुने मनपाय् व्यवसाय दर्ता, कर पुलातःगु, छेँया नक्सा पास भ्वँ, विज्ञापन करया आदि फुक्क ज्वनाः हाजिर जूवयेत पौ बियाथकूगु दु ।

अनुगमनय् वंगु पुचय् दुथ्याःगु मनपाया वातावरण शाखाया प्रमुख प्रदिप अमात्यं सिजी फुड्सपाखें उत्पादन जुइगु खाद्य सामग्रीया गुणस्तर प्रविधि व वातवारणी मापदण्ड बारे नं जाँच यानादीगु खः । अनुगमन पुचलं सिजी फुड्सयात लिपां वातावरणीय परीक्षणया रिपोर्ट नं पेश यायेत धयाथकूगु दु ।

सैबुइ चाउचाउ उत्पादनया झ्वलय् म्वः छ्यलेगु यानाच्वंगुलिं थुकी जःखःया वातावरण प्रदूषण जुयाच्वन धकाः स्थानीयपिंसं गुनासो यानाच्वंगु खँ धाःगु दु । थुकिया बारे थप अनुसन्धान यायेगु खँ अनुगमन समितिया संयोजक महर्जनं धयादीगु दु ।
मेखे बालकुमारीइ च्वंगु हिमालयन कलेजं धाःसा यल मनपाय् व्यवसाय दर्ता मयाःगु व घर जग्गा कर हे मपूगु लूगु दु । न्हापा बानेश्वरय् तयातःगु कलेज वि.सं. २०६९ निसें यलय् लाःगु बालकुमारीइ सरे जूगु खः ।

तर यल मनपाय् थ्व छुं दर्ता तकं मयासे च्वनाच्वंगु खः । संयोजक महर्जनं कर वर्ष २०७४ कथं थीथी छुट दइगु जानकारी बिसें याकनं कर पुलेत इनाप यानाथकूगु दुसा समितिया सदस्य सचिव दिल्ली राज शाक्यं छेँ दयेकाच्वंगु जूसां नक्सा पास जूगु निदँ लिपा घरजग्गा कर पुलेमाःगु व व्यवसाय दर्ता यायेमाःगु नियम बारे ध्वाथुइका थकूगु खः ।स्कुलं थःपिं न्हापा येँय् दर्ता जुयाच्वंगु खँ धासें याकनं स्थान्तरण यानाः यलय् दर्ता जुइगु जानकारी बिउगु दु ।

मनपाया अनुगमन पुचलं थ्वयां न्ह्यः लाबिम मल, यलया भाटभटेनी सुपरमार्केट, जिल्ला बाल संगठन, डिएभी स्कुल आदि थासय् अनुगमन यायेधुंकूगु दु । अनुगमन लिपा कर पुलीपिं अप्वया वयाच्वंगु खँ कनादिसें संयोजक महर्जनं अनुगमनयात थप प्रभावकारी यानाः कर सम्बन्धी जनचेतना बिया वनेगु खँ धयादीगु दु । यल मनपां थ्व दँय् जक छगू अर्ब १६ करोड राजश्व मुंकेगु लक्ष्य तयाः कर वर्ष घोषणा याःगु खः ।

सम्बन्धित बुखँ

LEAVE YOUR COMMENTS