पंचदान सुथां लाकेत मूल समिति

येँ- थुगुसीया पंचदान ज्याझ्वः सुथां लाकेत सामूहिक पंचदान कार्यक्रम मूल समिति- २०७५ नीस्वंगु दु । नेपाल परम्परागत बौद्ध धर्म संघ, कान्तिपुर शाखाया ग्वसालय् केशचन्द्र पारावर्त महाविहार इतुंबहालय् जूगु भेलां संघया केन्द्रीय अध्यक्ष नापं लुम्बिनी बौद्ध विश्वविद्यालयया उपकुलपति प्रा.डा. नरेशमान वज्राचार्यया संयोजकत्वय् १५१ म्ह दुजः दुगु मूल समिति नीस्वंगु खः ।

अथे हे ज्याझ्वःया निंतिं माःगु तयारी यायेत नीप्यम्हेसिया कार्य समिति नं गठन याःगु दु । संघया केन्द्रीय अध्यक्ष प्रा.डा. वज्राचार्यया सभापतित्वय् जूगु न्हापांम्ह उपाध्यक्ष नापं राजगुरुजु मञ्जुश्रीरत्न वज्राचार्यं लसकुस यासें पंचदान पर्वया महत्वया जानकारी बियादीगु खः ।
नेपाल वज्रयान महाविहार निर्माण मूल समितिया सदस्य सचिव नेमवीर शाक्यं लुम्बिनीइ निर्माण जुयाच्वंगु वज्रयान महाविहार निर्माण व संचालन बारे विस्तृत जानकारी बियादीगु खःसा उदाय समाजया प्रतिनिधि दिव्यरत्न स्थापितं समाजपाखें जुइगु पंचदानया निंतिं निमन्त्रणा यानादीगु खः ।