न्यायिक समितितय् राष्ट्रिय सम्मेलन जुइगु

येँ (नेपालभाषा टाइम्स)- यँ महानगरपालिकां न्यायिक समिति राष्ट्रिय सम्मेलन यायेगु तयारी न्ह्याकूगु दु । थ्वहे वइगु चैत २४ व २५ गते स्थानीय तह न्याय सम्पादनया अनुभव आदान प्रदान यायेगु आज्जु कथं सम्मेलन ग्वसाः ग्वयागु खँ येँ मनपां धाःगु दु । सम्मेलन तयारीया नितिं येँमनपाया उपमेयर सुनिता डंगोलया अध्यक्षताय् ‘न्यायिक समिति मूल समारोह समिति’ नीस्वंगु खः ।

उपमेयर डंगोलं फुक्कं पालिकापाखें न्यायिक समितिया प्रतिनिधित्व याकेगु व असल अभ्यास कालबिल यायेगु उद्देश्यं सम्मेलन ग्वसाः ग्वयागु जानकारी बियादीगु दु । सम्मेलन प्यंगू विषयय् केन्द्रित जुइ कथं कार्यपत्र तयार जुयाच्वंगु खँ नं वय्कलं कनादीगु दु ।

कार्यपत्रय् न्यायिक समितिया अवधारणा, थीथी कानुनय् दुगु न्यायिक समिति सम्बन्धी व्यवस्था, न्याय सम्पादनय् न्यायिक समितिया क्षेत्राधिकार व उकिया प्रचलन मुख्य विषय जुइगु खँ येँमनपां धाःगु दु ।

येँ विवाद निरुपण घोषणापत्र २०७९ जारी यासें सम्मेलन क्वचाइगु खँ धाःगु दु । सम्मेलन लिपा न्यायिक समिति राष्ट्रिय सञ्जाल, प्रदेश सञ्जाल व जिल्ला सञ्जाल ल्ययेगु ज्याझ्वः तयातःगु दु । राष्ट्रिय सञ्जालया पदाधिकारी ल्ययेगु ज्या सम्मेलनं हे जुइ ।