स्कुल बन्द याःगुलिं आलोचना
येँ (नेपालभाषा टाइम्स)÷देय्न्यंकं वःपिं शिक्षकतय्सं याःगु आन्दोलनया कारणं म्हिगः नं फुक्क हे सरकारी स्कुल बन्द जुलसा थुकिं यानाः करिब ८० लाख मस्त ब्वनेगुपाखें बञ्चित जुल ।
सरकारं सदनय् पेश याःगु शिक्षा विधेयक संशोधन याये माःगु माग यासें शिक्षक महासंघं थ्व आन्दोलन न्ह्याकूगु खः । थुकिया लागिं देय्या थीथी जिल्लां वःपिं शिक्षकत येँय् मुनाच्वंगु दु ।
शिक्षकतय् हडतालं यानाः म्हिगः नं फिब्वख्यःया यातायात अस्तव्यस्त जूगु खः । धर्ना च्वनाच्वंपिं शिक्षकतय्त चीकेगु झ्वलय् म्हिगः प्रहरी व शिक्षकतय् दथुइ घ्वात्तुघ्वानाः ल्वापु नं जूगु खः ।
थ्वहे झ्वलय् म्हिगः सरकारं आन्दोलनरत शिक्षकतलिसे वार्ता शुरु याःगु दु । कार्यवाहक प्रधानमन्त्री, गृहमन्त्री समेत च्वनाः याःगु वार्ता सफल धाःसा मजूगु खँ धाःगु दु । वार्ताया विषयय् म्हिगः कांग्रेस नेता लिसें कार्यवाहक प्रम पूर्ण बहादुर खड्कां पार्टीयात जानकारी बियादीगु खः ।
शिक्षकतय्सं यानाच्वंगु मागयात समर्थन याःसां स्कुल बन्द यायेगु ज्यायात धाःसा यक्वस्यां आलोचना याना हःगु दु ।रास्वपा लिसें कांग्रेसया हे गुलिखे सांसदतय्सं स्कुल बन्द मयायेत इनाप याःगु दु ।
महासंघं न्ह्यब्वःगु मागत मध्ये अस्थायी प्रकृतिया शिक्षकतय्त स्थायी यायेमाःगु, विद्यालय कर्मचारीया दरबन्दी सिर्जना यायेमाःगु आदि मागयात समर्थन वःसां शिक्षकतय् सरुवा स्थानीय तहपाखें याये मदइगु, थःपिं स्थानीय सरकार मातहत मच्वनेगु धकाः तःगु मागयात धाःसा यक्वस्यां आलोचना याना हःगु दु । महासंघं शिक्षकतय्त स्थानीय निकाय अन्तर्गत मखुसें संघीय सरकार अन्तर्गत तयेमाःगु माग याःगु खः ।
स्कुलय् नगर प्रहरीया अनुगमन
येँ महानगरपालिकां स्कुल बन्द यानाः आन्दोलनय् वने दइ मखु धकाः सुचं हे पिकयाः ख्याच्वः बिउगु खःसां म्हिगः धाःसा येँया फुक्क हे स्कुलत बन्द जुल । स्कुल बन्द जूगु दु लाकि मदु धकाः जाँच यायेत येँ मनपां नगर प्रहरीयात खटे यानाः स्कुल स्कुलय् छ्वःगु खः । स्कुल बन्द यानाः हडतालय् वनीपिं शिक्षक व प्रधानाध्यापकयात कारवाही यायेगु जुइ धकाः मनपां धाःसां नं गज्याःगु कारवाही जुइ धइगु खँ धाःसा धाये मफुनि ।
स्कुल मवःपिं शिक्षकतय् तलब काटे यायेगु खँ जक मनपां धाःगु दु । स्कुल बन्द याःगु खँय् विरोध यासें शिक्षकतय्त कारवाहीया ख्याच्वः बिउगु स्थानीय तह येँ महानगरपालिका छगू जक खः । मनपाया मेयर बालेन साहं सरकारं हःगु थ्व विधेयकया गुलिखे बुँदाय् थःपिनि नं असहमति दुसां स्कुल बन्द यानाः हडताल यायेगु धाःसा पाय्छि मखु धाःगु दु ।
आन्दोलनरत शिक्षकतय्सं धाःसा थःपिनि हाजिर कापी समेत फिब्व ख्यलय् यंकाः शिक्षकतय्त हाजिर यायेत अन हे सःतूगु खः । अन मवःपिं शिक्षकतय्सं हाजिर तकं याये मखनीगु खँ धाःगु दु । शिक्षकतय्सं थौं नं फिब्व ख्यलय् मुनाः आन्दोलन यायेगु ज्याझ्वः दयेकातःगु दु ।
LEAVE YOUR COMMENTS