एकेदेमिइ कवयित्री मय्जुपिनिगु साहित्यिक ज्याझ्वः

किपू(नेपालभाषा टाइम्स)- नेपालभाषा एकेदेमिइ नेपालभाषा कवयित्री मय्जुपिनिगु साहित्यिक ज्याझ्वः जूगु दु । एकेदेमिया साहित्य कवःया ग्वसालय् वंगु शनिवाः ‘मुखू ब्यंगु कविताया सवाः’ नामं उगु साहित्यिक ज्याझ्वः जूगु खः ।

मिसापिंत जक चिनाखँ च्वकाः नेपालभाषा काव्य ख्यःयात चकंका यकेगु व थुकियात अभियानया हे रुपय् न्ह्यःने यंकेगु तातुनाकथं उगु ज्याझ्वः जूगु खः । एकेदेमिया साहित्य कवःया ग्वसालय् चरणवद्ध रुपं न्ह्यानाच्वंगु ज्याझ्वः अन्तर्गत शनिवाः जूगु सृजनात्मक चिनाखँ च्वज्या व कार्यशाला गोष्ठिया निगूगु चरणया ज्याझ्वलय् झिंखुम्ह कवयित्रीपिनिगु चिनाखँ झिंप्यम्ह कवयित्रीपिंसं पाठ यानादीगु खः ।

ज्याझ्वलय् न्हूपिं कवयित्रीकथं पिलू वःपिं रोनिका श्रेष्ठ, युक्ता वज्राचार्य, ज्ञानकेशरी श्रेष्ठ, दिलकुमारी महर्जन, सविना महर्जन, रुपा शाही, रहेना नकःमि मानन्धर, मिनर्भा शर्मा, विनिता वज्राचार्य, मिमला शर्मा, हिसिलिना शाक्य, शोभा महर्जन, कृता वज्राचार्य, विणा नेम्कुल, मन्दिरा श्रेष्ठ, मञ्जुसिंह श्रेष्ठं थःथःगु रचना पाठ यानादीगु खः ।

वय्कःपिंसं पाठ यानादीगु चिनाखँयात कयाः साहित्यकारलिसें समालोचक ध्रुव मधिकःमि व नेपालभाषा केन्द्रीय विभागया प्रमुख सह प्रा. रास जोशीं कविताया भाषा, लेखन शैली, साहित्य व सौन्दर्यतानापं थीथी पक्षयात कयाः टिप्पणी यानादीगु खः ।

ज्याझ्वलय् नेपालभाषा साहित्य ख्यःया नांजाःपिं कविपिं सुरेश किरण, राजेन्द्र पुता, नवीनप्रकाश श्रेष्ठ, वसन्त नकःमि, राज अक्षोभ्य, कविन्द्रलाल प्रधान नापं न्हू पिलू वःम्ह राजेन्द्र महर्जनं पाहांकथं चिनाखँ ब्वनाः न्यंकादीगु खः ।

भाषाविद् नापं समालोचकलिसें संयुक्त राष्ट्र संघया आइएलओय् उच्च प्राविधिकया रुपय् ज्या यानाः विश्वन्यंकं मिसा सशक्तिकरणय् ज्या यानादीधुंकूम्ह नांजाःम्ह व्यक्तित्व ड. ज्योतिप्रभा तुलाधरया अवधारणाकथं वय्कःया हे संयोजनय् उगु ज्याझ्वः जूगु खः । स्वंगू चरणय् न्ह्याइगु ज्याझ्वःया न्हापांगु चरणया ज्याझ्वः वंगु वालय् जक जूगु खःसा शनिवाः निगूगु चरणया ज्याझ्वः जूगु खः ।

एकेदेमिया चान्सलर यज्ञरत्न धाख्वाया सभापतित्वय् न्ह्याःगु ज्याझ्वलय् साहित्य कवःया कजि त्रिरत्न शाक्यं लसकुस यानादीगु खःसा एकेदेमिया दुजः कवयित्री मय्जु रजनी मिलाया सह संयोजनय् उगु ज्याझ्वः जूगु खः ।