मानन्धर संघया स्वदँया तःमुँज्या छक्वलं

येँ ÷ केन्द्रीय मानन्धर संघया स्वंगू आर्थिक दँया तःमुँज्या छक्वलं जूगु दु । दँय्दसं जुइगु संघया तःमुँज्या विश्वय् महामारीया रुपय् न्यना वंगु कोरोना भाइरस संक्रमणया कारणं निदँ लिज्याःगु खः । कोरोना संक्रमणलिसें थीथी कारणं निर्धारित इलय् जुइमफुगु मानन्धर संघया ३०, ३१ व ३२ क्वःगु तःमुँज्या छक्वलं जूगु खः ।

थनया कालिमातिस्थित लुमन्ति छेँय् जूगु तःमुँज्या संघया सभापति मनोजकुमार मानन्धरया सभापतित्वय् जूगु खः । त्वाःदेवाय् मत च्याकाः संघया संस्थापक सभापति देवीदास मानन्धरया किपाय् स्वां देछासे न्ह्याःगु ज्याझ्वलय् संघया उपसभापति बद्रीनारायण मानन्धरं लसकुस यानादीगु खः ।

संघया सचिव गजेन्द्रमान मानन्धरं स्वदँया दुने संघपाखें जूगु थीथी गतिविधिसहितया प्रगति विवरण न्ह्यब्वयादीगु तःमुँज्याय् कोषाध्यक्ष सन्देश मानन्धरं आर्थिक दँ ०७५÷७६, ०७६÷७७ व ०७७÷७८या वार्षिक द्याःत्याः ल्याः न्ह्यब्वयादीगु खः ।

तःमुँज्याय् न्ह्यब्वःगु निगुलिं प्रतिवदेनयात कयाः थीथी त्वाः गुथि खलःया प्रतिनिधिपाखें थःथःगु न्ह्यसः, जिज्ञासा तयेगु ज्या जूगु खः । ज्याझ्वलय् गणेश साय्मि (थँहिति), हरिओम मानन्धर (लाय्कूसाः) रमेश मानन्धर (भिंद्यः गुथि) व ज्ञानेन्द्र मानन्धर (पुखुद्यां) त्वाःपाखें निगुलिं प्रतिवेदनयात कयाः न्ह्यसः तयादीगु खःसा उकिया लिसः बीगु ज्यालिसें प्रतिवेदन पारित याःगु खः । तःमुँज्याया निगूगु सत्रय् संघया कार्यसमितिया दुजःपिनिगु ल्यज्या जूगु खः । संघया विधानकथं कार्यसमितिया झिंनिम्ह दुजःपिनिगु ल्यज्या जूगु खः ।

संघया न्हूगु ज्यासना पुचःया निंतिं जूगु निर्वाचनय् बद्रीनारायण मानन्धर (पाक्व, पुखुद्यां), राजेन्द्र मानन्धर (मच्छेगां), विजयकुमार मानन्धर (वतु), जुजुकाजी मानन्धर (किपू), तुलसीकाजी मानन्धर (ख्वप), गजेन्द्रप्रसाद मानन्धर (धालासिक्व), प्रकाशबहादुर मानन्धर–भिंद्यः गुथि), कृष्णबहादुर मानन्धर (न्हूसाः), राजु मानन्धर (मरुध्वाखा), गजेन्द्रमान मानन्धर (चस्वांद्वँ), शैलेन्द्रकुमार मानन्धर (दैसाः), सुशीला मानन्धर (न्यागःमणि फेदी) निर्विरोध निर्वाचित जुयादीगु खः ।

संघया झिंन्याम्हेसित कार्यसमितिइ सभापतिया ल्यज्या आकिवं जुइगु तःमुँज्याय् जक जुइसा निम्ह मनोनित यायेगु प्रावधानकथं किरणकुमार मानन्धर (लाय्कूसाः) व कृष्णकाजी मानन्धर (थिमि)यात मनोनित याःगु खः । संघया विधानकथं निर्वाचित दुजःपिनिगु न्हापांगु मुँज्या च्वनाः न्हूगु ज्यासना पुचःया उपसभापति, सचिव, कोषाध्यक्ष, निम्ह सहायक सचिव व सहकोषाध्यक्ष ल्ययेगु ज्या जुइ ।

ज्यासना पुचःया दुजःपिं ल्ययेगु निंतिं संघया पुलांम्ह उपसभापतिलिसें प्रबुद्ध व्यक्तिपाखें सम्मानित पंचकुमारी मानन्धरया संयोजकत्वय् धर्मकृष्ण मानन्धर, डा. भगवानदास मानन्धर, राजेन्द्र मानन्धर व ई. अमरबहादुर मानन्धर दुथ्याःगु निर्वाचित कमिटी गठन याःगु खः ।

सम्बन्धित बुखँ

LEAVE YOUR COMMENTS