जरिवाना मिनाहा यायेत बालेनया इनाप

येँ(नेपालभाषा टाइम्स)- येँ महानगरपालिकाया मेयर बालेन साहं थःत निर्वाचन आयोगं तोके यानातःगु जरिवान मिनाहा याना बीत इनाप यासें निर्वाचन आयोगय् निवेदन बियादीगु दु । निर्वाचन खर्च विवरण क्वःछिनातःगु इलय् हे आयोगयात बुझे मयाः धकाः मेयर साहयात आयोगं ७ लाख ५० हजार तका दां जरिवाना पुइकेगु निर्णय याना–तःगु दु । खुलाया दुने बं मपुल धाःसा निर्वाचित पदाधिकारीया पद हे निष्क्रिय जुइगु कानुनी व्यवस्था दुगुलिं साहं थःत तोके यानातःगु जरिवाना मिनाहा यायेत निवेदन बियादीगु खः ।

तर निर्वाचन कानुनय् धाःसा जरिवाना मिनाह यायेगु वा पुनर्मूल्यांकन यायेगु कानुनी व्यवस्था मदुगु खँ धाःगु दु । मेयर साहं थः निर्वाचित जुइधुनेवं फेसबुकय् थःगु खर्च विवरण सार्वजनिक यानागु व निर्वाचनया कन्हय् कुन्हुंनिसें हे फोहोर व्यवस्थापनया ज्याये वनेमाःगुलिं खर्च विवरण बुझे यायेमफुगु खँ निवेदनय् न्ह्यथनातःगु दु ।

आयोगया कानुनी शाखां मेयर साहया निवेदनयात कयाः थप कारबाहीया नितिं सिफारिस यायेधुंकूगु दु । आयोगं खर्च विवरण बुझे मयाःपिं छगू लाख स्वयां अप्वः उम्मेदवारतय्त जरिवाना पुइकेगु व चुनाव ल्वाये मदइ कथं कारवाही यायेगु धाःगु दु ।

सम्बन्धित बुखँ

LEAVE YOUR COMMENTS