कोरोना संक्रमण : खोप अस्थायी समाधान, बांलाःगु उपाय सचेतना

येँ – कोरोना भाइरस पाखें बचे जुइगु बांलाःगु उपाय थुकिया पाखें सचेत जुइगु हे खः । नेपाल विज्ञान तथा प्रविधि प्रज्ञा प्रतिष्ठानया प्राज्ञ डा. दिनेश भुजुं नेपाल पत्रकार राष्ट्रिय दबूया फेसबुक लाइभ ज्याझ्वलय् न्ह्यसः लिसःया झ्वलय् थ्व खँ धयादीगु दु । वय्कलं खोप धयागु खँ अस्थायी समाधान जक जूगुलिं छुं नं भाइरसपाखें बचे जुइगु धयागु उकिया पाखें गथे यानाः बचे जुइगु धयागु विज्ञान हे खः धयादीगु दु ।

संसारय् आःतक २१९ गू भाइरस वयेधुंकूगु खँ न्ह्यथँसें थज्याःगु थीथी भाइरसपाखें बचे जुयाच्वंगु धयागु सचेतनाया कारणं खः धयादिसें वय्कलं धयादिल, ‘एडस धयागु नं छगू भाइरस हे खः, तर थुकियापाखें सचेत जुइफुगुलिं हे थ्व ल्वय् न्ह्याम्हेसितं संक्रमण जुइमखु । थुकियात बेवास्ता याःपिंत हे जक संक्रमण जुइगु खः । अथेहे कोरोनाया संक्रमण पाखें बचे जुइगु खःसा थुकिया पाखें सचेत जुयाः च्वनेगु हे खः ।’

वय्कलं कोरोनापाखें बचे जुइगु खःसा सामाजिक, भौतिक दूरीइ कायम यायेगु, मास्क तया जुइगु हे बांलाःगु उपाय जुइगु खँ धयादीगु दु ।

विश्वय् आःतक कोरोनाविरुद्ध ३१ गू खोप परिक्षणया चरणय् वने धुंकूगु व न्हयगू खोप अन्तिम परीक्षण दुगु खँ न्ह्यथनादिसें वय्कलं खोपपाखें छगू भाइरसयात जक पनेफइ, मेमेगु भाइरस ब्वलंके मबीगु खःसा मनूत प्राकृतिक आहार व्यहारय् च्वनेमाःगु खँ नं धयादीगु दु ।

वय्कःलिसे जूगु खँल्हाबल्हाया भिडियो स्वयादिसँ