आः एमाले तछ्यायेगु षडयन्त्र जुइफु ः अध्यक्ष ओली

येँ – एमाले अध्यक्ष केपी शर्मा ओलीं अध्यादेश हयाः एमाले तछ्यायेगु कुतः जुइ फइगु खँ धयादीगु दु । प्रधानमन्त्री पद मदयेधुंकाः म्हिगः न्हापांखुसी च्वंगु पार्टी संसदीय दलया बैठकय् न्ववासें वय्कलं उगु खँ धयादीगु खः ।

वय्कलं धयादिल, ‘एमाले विरुद्ध अझ नं षडयन्त्र जुइफु, अध्यादेश हयाः पार्टी तछ्यायेगु कुतः जुइफु, सदन याकनं हे बन्द यायेफु, प्रदेश व स्थानीय तहलय् नं दुःख बीफु,दमनया शुरुवात जुइफु ।’

संसद विघटन विरुद्ध सर्वोच्च अदालतय् लाःगु रिटय् बार एशोसिएसनया दबाबय् इजलास बने जुइवं षडयन्त्र शुरु जूगु बिचाः नं तयादीगु खः ।

उकथं हे वय्कलं शेरबहादुर देउवां मन्त्रिपरिषद विस्तार याये मफयाः थःगु पार्टीया सांसदपिंत थीथी कथंया आश्वासन बियाच्वंगु द्वपं नं बियादिल । वय्कलं धयादिल, ‘देउवां मन्त्रिमण्डल विस्तार याये फयाच्वंगु मदु, गठबन्धनया औचित्य पुष्टी याये फयाच्वंगु मदु, जिं मन्त्री दयेका बी, जिं ध्यबा बी धयाच्वंगु दु ।’

दलया बैठक न्ह्यः पार्टी स्थायी कमिटीया बैठक च्वंगु खः । उगु बैठकं एमाले एकता यायेत नीस्वनातःगु कार्यदल नं भंग याःगु दुसा कार्यदलं बिउगु सुझाव धाःसा स्वीकार याःगु दु ।

उकथं हे बैठकं प्रधानमन्त्री देउवा नेतृत्वया गठ– बन्धन सरकारयात विश्वासया मत मबीगु निर्णय याःगु दुसा आः सदनय् सशक्त प्रतिपक्षया भूमिका म्हितेगु प्रस्ताव नं याःगु दु ।
म्हिगःया स्थायी कमिटी बैठकय् नेपाल पक्षया नेतात धाःसा सुं हे उपस्थित मजूगु खः । वरिष्ठ उपाध्यक्ष वामदेव गौतम नं अनुपस्थित जूगु खः । म्हिगः स्थायी कमिटीया बैठक जुयाच्वंगु इलय् नेपाल पक्षया कार्यदलया दुजःपिं स्थायी कमिटीया बैठक जुयाच्वंगु थासय् वनाः बैठक स्थगित यायेत माग याःगु खःसा अध्यक्ष ओलीं उकियात अस्वीकार याःगु खः ।

कार्यदल भंग यायेधुंकाः एमालेया निगू पक्षया एकता आः छु जुइगु धइगु न्ह्यसः नं ब्वलंगु दु ।

ओली पक्षं धाःसा कार्यदल भंग जूसां नं पार्टी एकताय् पंगः मवइगु खँ धायेगु यानाच्वंगु दुसा नेपाल पक्षं ओलीया कारणं यानाः आः एकता सम्भव मदइगु खँ धाःगु दु ।