ने. सं. ११४३ तछलाथ्व दशमी -

सेनाया गोप्य दस्तावेज सार्वजनिक

फास्ट ट्राय्कया परामर्श नियुक्तिइ गोलमाल

येँ – येँ–निजगढ फास्ट ट्राय्क निर्माण सम्बन्धी ज्याया लागिं परामर्शदाता ल्ययेत तयार यानातःगु मापदण्ड आह्वान याये न्ह्यः हे सार्वजनिक जूगु खँ सीदुगु दु । थ्व ज्याया लागिं परामर्श नियुक्त जुइम्ह परामर्शदाता गज्याःम्ह जुइमाः धकाः तयार यानातःगु मूल्यांकन मापदण्ड परामर्शदाता आह्वान याये न्ह्यः हे सार्वजनिक जूगु खः ।

आयोजना सुपरीवेक्षणया निंतिं अन्तर्राष्ट्रियस्तरया परामर्शदाता ल्यये माःगु आवश्यक जूगु खः । उकिया लागिं आवश्यक मापदण्डया प्रारम्भिक मस्यौदा तयार यानातःगु खःसा आः उगु मस्यौदा हे सार्वजनिक जूगु खँ धाःगु दु । उगु फास्ट ट्राय्क नेपाली सेनां दयेकाच्वंगु खःसा परामर्शदाताया मापदण्ड नं सेनां हे तयार याःगु खः ।

तर सेनाया अज्याःगु गोप्य दस्तावेज हे सार्वजनिक जूगुलिं थुकियात गम्भीर रुपं काःगु दु । थुगु खँयात कयाः आः रक्षा मन्त्रालय व सेनाया जंगी अड्डाय् उजुरी लायेधुंकाः प्रधान सेनापति पूर्णचन्द थापाया निर्देशनय् ‘कोर्ट अफ इन्क्वाइरी’ गठन याःगु खः । थ्व इन्क्वाइरीं लछि तक अनुसन्धान यानाः मापदण्ड चुहावत जूगु धकाः निष्कर्ष पिकाःगु खँ नेपाली सेनाया सूचना तथा जनसम्पर्क निर्देशनालयं धाःगु दु ।

तर मापदण्ड चुहावत जुयाः पिहां वःगु निष्कर्ष पिकाःसां थुकिया लिउने सुयागु ल्हाः दु धइगु खँ धाःसा आः तक पत्ता लगे मफुनिगु खँ धाःगु दु ।मूल्यांकन मापदण्ड चुहावट जुइवं सेनां आः आयोजनायात थप पारदर्शी यायेगु तयारी याःगु दु । उकिया निंतिं आः अप्राविधिकयात मखुसें प्राविधिकयात हे आयोजनाया प्रमुख दयेकेगु निर्णय नं याःगु दु ।

न्हापा अप्राविधिक जूसां आयोजना प्रमुख दयेकेगु यानाच्वंगु खः । फास्ट ट्राय्कया ज्यायात प्रभावकारी दयेकेगु निंतिं नं थुगु निर्णय काःगु खँ सेनां धाःगु दु । सेनाया कथं फास्ट ट्राय्कया ज्या आः तक १२ प्रतिशत क्वचायेधुंकूगु दु । सेनां सरकारं क्वःछिनातःगु इलय् ज्या क्वचायेकेगु तयारी जुयाच्वंगु दु । २०७४ साउन २७ गते सेनायात फास्ट ट्राय्कया जिम्मेवारी बिउगु खःसा प्यदँया दुने क्वचायेकेगु ई क्वःछिनातःगु दु ।

झिंन्यान्हुया दुने प्रदेशया नां

येँ – प्रदेश नम्बर ३ या मुख्यमन्त्री डोरमणि पौडेलं ३ नम्बर प्रदेशया स्थायी राजधानी व नां आः थ्वहे वइगु झिंन्यान्हुया दुने निर्धारण जुइगु खँ कनादीगु दु ।

आन्तरिक राजश्व विभाग व सिस्नुपानी नेपालं बिहीवाः हेटौंडाय् ग्वसाः ग्वःगु करमैत्री यात्रा हास्यव्यंग्य मनोरञ्जन ज्याझ्वःया उलेज्या यासें वय्कलं उगु खँ धयादीगु खः । वय्कलं धयादी, ‘राजधानी व प्रदेशया नांया बारे यक्व चर्चा जुइधुंकल, आः झिंन्यान्हुया दुने क्वःछीगु जुइ ।’ राजधानी व प्रदेशया नां क्वःछीगु ज्याय् पंगः थनाच्वन धकाः वय्कःया यक्व आलोचना नं जुयाच्वंगु दु ।