पिक एण्ड ड्रप न्हूगु सवारी नियम

अप्वया वनाच्वंगु सवारी जाम म्हो यायेगु ल्याखं येँ महानगरपालिकां म्हिगः आइतवाःनिसें तिंख्यः जःखःया लागाय् सार्वजनिक सवारी साधनं यात्रु पियाच्वने मदइकथं क्वकायेगु व गयेकेगु (पिक एण्ड ड्रप) अभियान न्ह्याकूगु दु । छगः सवारी साधनं छुं यात्रु पियाच्वनेगु झ्वलय् ताःईतक जाम जुयाः यक्वसिया उत्पादनशील ई सितिं वंगु, इन्धनया कारणं वातावरणय् ¥हास वःगु जूगुलिं थुकथंया समस्याय् न्यूनीकरण यायेत ‘पिक एण्ड ड्रप’ अभियान न्ह्याकागु येँ मनपाया प्रमुख विद्यासुन्दर शाक्यं कनादिल ।

तिंख्यःयात केन्द्र दयेकेबलय् महानगरीय प्रहरी ज्याकू रानीपुखूनिसें लुँमधि (भद्रकाली)तकया सतकय् दकलय् अप्वः समस्या खने दयाच्वंगु खः । थ्व थासं थीथी रुट जुयाः थीथी थासय् थीथी यातायात कम्पनीया सवारी साधन चले जुइगु खः । न्हापांगु चरणय् थीथी झिंछगू रुटय् थ्व ‘पिक एण्ड ड्रप’ अभियान लागू जुइ ।

छगः सवारी साधनं छगू थासं जक यात्रु क्वकायेगु व गयेके बी दइ । क्वःछिनातःगु ‘स्टप’ बाहेक मेगु थासय् यात्रु क्वकायेगु व गयेकेगु यात धाःसा कानूनकथं कारवाही जुइगु महानगरपालिकां न्ह्यथंगु दु । थ्व अभियानं सफलता प्राप्त यात धाःसा स्वनिगःया मेमेगु सतकय् नं ‘पिक एण्ड ड्रप’ नियम लागू याना यंकेगु सरकारया तयारी दु ।

तिंख्यलं सिंहदरवार जुयाः बानेश्वर वनीगु सवारी साधनं राष्ट्रिय सभागृहया जवंखवंया भृकुटीमण्डपया स्टप व माइतीघरं बबरमहलया दथुइ जक यात्रु क्वकायेगु व गयेके बी दइ । तिंख्यलं सिंहदरवार जुयाः यलपाखे वनीगु सवारी साधनं राष्ट्रिय सभागृहया जवंखवं भृकुटीमण्डपया स्टप व थापाथालीस्थित खाद्य संस्थान न्ह्यःने यात्रु क्वकायेगु व गयेके दइ ।

तिंख्यलं त्रिपुरेश्वर जुयाः कालिमातिपाखे वनीगु सवारी साधनं राष्ट्रिय सभागृहया जवंखवंया भृकुटीमण्डपया स्टप व त्रिपुरेश्वर स्टप, तिंख्यलं लैनचोर जुयाः नयाँबजारपाखे वनीगु सवारी साधनं नेपाल वायुसेवा निगम न्ह्यःने व लैनचौरस्थित दुग्ध विकास संस्थान न्ह्यःने जक यात्रु क्वकायेगु व गयेके दइ ।

थुकथं हे तिंख्यलं लैनचौर जुयाः महाराजगंज व धौबिचौर वनीगु सवारी साधनं नेपाल वायुसेवा निगम न्ह्यःने व लैनचौरस्थित खानी तथा भूगर्भ विभाग न्ह्यः जक यात्रु क्वचायेगु व गयेके दइ । तिंख्यलं विश्वज्योति, घन्टाघर, कमलपुखू, नागपुखू वनीगु सवारी साधनं नेपाल वायुसेवा निगम व रत्नपार्क व तिंख्यः स्वयां पिहां वनीगु सवारी साधनं रत्नपार्क न्ह्यःने व तिंख्यःस्वयां पिनेया बसस्टपय् जक यात्रु क्वकायेगु व गयेके दइ ।

पुलांगु बसपार्क दुने यात्रु गयेकेगु वक्वकाइगु सवारी साधनया निंतिं पुलांगु बसपार्क दुनेया स्टप व तिंख्यः जःखः स्वयां पिने दुगु स्टप व ताःहाकःगु दूरीया ततःग्वःगु यात्रुबस छखे भृकुटीमण्डप व लिहां वयेगु इलय् नेपाल वायुसेवा निगम जुयाः चले जुइगु सवारी साधनं छखेपाखे नेपाल वायुसेवा निगम न्ह्यःने व मेगुपाखे भृकुटीमण्डपं जक यात्रु क्वकायेगु व गयेकेमाःगु जुइ ।

अथे हे निगूगु स्टपया निंतिं तिंख्यः जःखः स्वयां पिने दुगु स्टपं जक यात्रु क्वकायेगु व गयेकेमाःगु जुइ । वायुसेवा निगम न्ह्यःने स्टप दयेकाः थीथी थासय् वनीगु सफा ट्याम्पुं निगम न्ह्यःने स्टप व मेमेगु सवारी साधनं प्रयोग याइगु स्टप व बागबजारस्थित ख्वप बसपार्कं यात्रु ज्वनाः वइगु सवारी साधनं उगु हे थासय् व माइतीघर व बबरमहलया दथुं यात्रु क्वकायेगु व गयेके दइ ।

छुं दिं न्ह्यः सरोकारवालालिसे जूगु बैठकय येँ महानगरपालिकाया प्रमुख शाक्यं स्वनिगःया सतक न्ह्याक्व हे तब्या याःसां सवारी साधन जामया समस्या झन् जटिल जुया वनाच्वंगु धासें बहुपक्षीय लाभया निंतिं सकसिनं ग्वाहालि यायेमाःगु खँ धयादीगु खः । वय्कलं न्हापांगु चरणय् थीथी झिंछगू रुटय् चले जुइगु सवारी साधनयात थ्व नियम लागू यानागु खःसां लिपा वनाः थ्व नियम मेमेगु रुटय् नं लागू यायेगु जुइ धयादिल ।

सम्बन्धित बुखँ

LEAVE YOUR COMMENTS