बेइजिङय् अरनिको श्वेत चैत्यया ७५० औं वार्षिकोत्सव

येँ(नेपालभाषा टाइम्स)( चीनया राजधानी बेइजिङय् निर्माण यानातःगु श्वेत चैत्य स्थापनाया ७५०क्वःगु वार्षिकोत्सव तःजिक हंगु दु । नेपाःया राष्ट्रिय विभूति अरनिकों राजधनी बेइजिङय् उगु श्वेत चैत्य निर्माण याःगु खः ।

चिनिया सरकार, चिनिया कम्युनिष्ट पार्टी, चीनस्थित नेपाली दूतावासलिसें थीथी निकायया प्रतिनिधिया उपस्थितिइ राजधानी बेइजिङय् श्वेत चैत्यया वार्षिकोत्सव हंगु खःसा ‘चीन व नेपाःया सांस्कृतिक सम्पदायात नापं न्ह्यःने यंकेगु नु’ धइगु नारालिसें श्वेत चैत्य निर्माणया वार्षिकोत्सव छवाःयंकं थीथी ज्याझ्वः यासें हंगु खः ।

१३ औं शताब्दीपाख चीनय् युआन राजवंशया इलय् कलाकार अरनिकों उगु श्वेत चैत्य दयेकूगु खःसा चैत्य निर्माणलिसें चीनय् नेपाःया मौलिक कला, संस्कृति व बद्ध धर्म नं न्यना वंगु धइगु धापू दु ।

वार्षिकोत्सव उलेज्याझ्वःया इलय् श्वेत चैत्य परिसरय् नेपाः व चीनया कलाकृति, काष्ठकला, हस्तकलालिसें पौभाःया ब्वज्या नं याःगु खः । लिसें उलेज्याझ्वलय् श्वेत चैत्य निर्माणय् प्रयोग जूगु कला, शिल्प, कलाशैली, देगः आदिया भिडियो सामग्री नं न्ह्यब्वःगु खः । उगु इलय् श्वेत चैत्य व्यवस्थापन ज्याकू, बेइजिङ व यलया पाटन संग्रहालय दथुइ छगू समझदारी पत्रय् ल्हाःचिं तयेगु ज्या नं जूगु खः ।

सन् १२७१ य् नेपाली इन्जिनियरया रेखदेखय् निर्माण जूगु श्वेत चैत्ययात सन् १९६१ लय् राष्ट्रिय सम्पत्तिया रुपय् सुचीवद्ध याःगु खः । श्वेत चैत्य लिक्कं कलाकार अरनिकोया झ्वाता नं तयातःगु दु ।