पद्मरत्नया लुमन्ति ज्याझ्व:

येँ- झिंच्याक्वःगु शंखधर दिवसया लसताय् नेपाल सम्वत आन्दोलनया न्ह्यलुवाः पद्मरत्न तुलाधर लुमन्ति ज्याझ्व: जूगु दु। न्हूदँ समारोह समितिया ग्वसालय् जूगु उगु ज्याझ्वः समितिया नायः रमेश महर्जनया नाय:सुइ सचिवालय कजि उमेश स्थापितं ज्याझ्वःन्ह्याकादीगु खः ।

ज्याझ्वःस नुग:खॅं तयेगु झ्वलय् मानवअधिकारवादी नागरिक आन्दोलनया न्ह्यलुवाः श्याम श्रेष्ठं पद्मरत्न तुलाधरयात राष्ट्रिय विभूति घोषणा यायेमाःगु खॅं न्ह्यब्वयादीगु ख:। वय्कलं अन्तर्राराष्ट्रिय रुपं नेपालं छम्ह नागरिकया नां न्ह्यब्वयेबलय् पद्मरत्नयात न्ह्यब्वइगु, आदिवासी जनजाति आन्दोलनया लिसें सकतां सकतां आन्दोलनय् वय्कलं यानादीगु योगदान व छम्ह स्वच्छम्ह नागरिक जूगुलिं सरकारं पद्मरत्नयात राष्ट्रिय विभूति घोषणा यायेमाःगु माग यानादीगु खः ।

ज्याझ्वलय् नेवाः न्ह्यलुवाः मल्ल के. सुन्दरं पद्मरत्न बहुआयामिक व्यक्ति जूगु धासें पद्मरत्नं न्ह्याकादीगु सकतां आन्दोलन आः नं न्ह्यानाच्वंगु बिचाः तयादीगु ख:। नेपाल सम्वत न्हूदँ नख: जक मखुसे आन्दोलन जूगु बिचाः नं मल्लं प्वंकादीगु ख: । ज्याझ्वलय् गोविन्दमान श्रेष्ठ, डा. पुष्पराज राजकर्णिकारपिन्सं नं नेपाल सम्वत् व पद्मरत्न तुलाधरयात कयाः थःथःगु बिचाः प्वंकादीगु खः । पद्मरत्नया चीधिकःम्ह काय् सर्वणरत्न तुलाधरया ब्वतिकयादीगु खः ।