माओवादीया तःमुँज्याय् संविधान संशोधनया चर्चा

येँ -नेकपा माओवादी केन्द्रया च्याक्वःगु तःमुँज्या म्हिगःनिसें येँय् शुरु जुल । म्हिगः जूगु उलेज्या समारोहय् थीथी राजनीतिक पार्टीया शीर्ष नेतातय्सं न्ववानादिल ।

ज्याझ्वलय् न्ववासें प्रधानमन्त्री लिसें नेपाली कांग्रेसया सभापति शेरबहादुर देउवां माओवादी अध्यक्ष पुष्पकमल दाहालया हे अडानं यानाः संविधानसभापाखें संविधान दयेके फुगु खः धयादिल । लिसें वय्कलं न्यागू दलीया गठबन्धन पूरा कार्यकाल चले जुइ धासें थ्व गठबन्धन सुं नं पार्टी वा व्यक्तिया विरुद्ध गठन जूगु मखु धकाः नं स्पष्ट यानादिल ।

लोकतान्त्रिक समाजवादी पार्टीया नेता अनिलकुमार झां संविधान जारी जूगु न्यादँ दयेधुंकाः नं मधेशया माग सम्बोधन मजूगु धासें संघीयता व समावेशीकरणया मुद्दाया उचित समाधान मलूतले माओवादी जनयुद्धया मर्म पूवनी मखु धयादिल ।

वय्कलं देशय् संघीयता वःसां नं उकिया अनुभूति जुइ मफयाच्वंगु खँ धासें धयादिल, ‘थ्व देशय् संघीयता वल, तर गज्याःगु संघीयता वल सुनां नं अनुभव याये फयाच्वंगु मदु, थ्व संविधानय् फुक्कं दु, तर छुं नं मदु ।’

उकथं हे जनता समाजवादी पार्टीया अध्यक्ष उपेन्द्र यादवं संविधान संशोधन जुइमाःगु खँ माग यासें एमालें यानाच्वंगु संसद अवरुद्धयात चीकाः संविधान संशोधन यायेमाःगु बिचाः तयादिल ।
नेकपा एमालेया महासचिव शंकर पोखरेलं तत्कालीन नेकपाया एकतायात बचे याये मफुगुली थःत पश्ताचाप जूगु खँ धयादिल । वय्कलं एमाले व माओवादी केन्द्र मिले जुयाः नेकपा गठन जूगु गलत मखु धासें जनताय् वनेगु ज्या नं प्रतिगमन मजूगु धयादिल । वय्कलं आः तक राज्य दुने जूगु उपलब्धी गुगुं छगू दलं जक हःगु उपलब्धी मखुसें १२ बुँदे सहमति, निक्वःगु जनआन्दोलनया कुतलं जूगु खः धयादिल । एमालेया अध्यक्ष केपी ओली ज्याझ्वलय् मथ्यं ।

उकथं हे पुलांम्ह प्रधानमन्त्री लिसें नेकपा एकीकृत समाजवादी पार्टीया अध्यक्ष माधव नेपालं आः देशय् सुं नं व्यक्ति वा वंशया तानाशाही स्वीकार्य जुइ मखु धयादिल । नेपाःया राजनीतिक इतिहासय् दलत छप्पँ जुयाः न्ह्याःवंगुलिं सफलता चूलाःगु खः धासें आः नं छप्पँ जुयाः न्ह्याः वनेमाःगु बिचाः तयादिल । वय्कलं राजतन्त्रया अन्त्य, गणतन्त्र स्थापना, संघीयता व धर्मनिरपेक्षतायात ल्यंकेत दलत छगू हे थासय् दनेमाःगु खँ नं धयादीगु दु ।

समारोहय् राष्ट्रिय जनमोर्चाया नेता दुर्गा पौडेल, नेकपा क्रान्तिकारी माओवादीया नेता सीपी गुजुरेल, मालेया महासचिव सीपी मैनालीं नं न्ववानादीगु खः । तःमुँज्याया उलेज्या माओवादी केन्द्रया अध्यक्ष पुष्पकमल दाहालं यानादीगु खः ।

सम्बन्धित बुखँ

LEAVE YOUR COMMENTS