कलंकी अन्डरपास आइतवाःनिसें चालीगु

येँ – कलंकीइ दयेकूगु अन्डरपास वइगु आइतवाःनिसें सञ्चालनय् वइगु जूगु दु । मोहनिया इलय् यातायातया चाप म्हो यायेगु ताः तयाः वइगु आइतवाः निसें अन्डरपास चायेकेत्यंगु खः । थ्व स्वयां न्ह्यः वंगु साउन महिनाय् परीक्षणया निंतिं छुं न्हि जक चायेकूगु खः । अन्डरपास चायेकेगु निंतिं थौंकन्हय् पीच यायेगु ज्या जुयाच्वंगु दु । आयोजनाया कथं अन्डरपास वइगु असोज १४ गते दुने पीच यायेगु ज्या क्वचाइ ।

आः नं मोहनियात लक्षित यानाः जक अन्डरपास चायेकेत्यंगु खः । मोहनि लिपा हाकनं प्यन्हु तक बन्द यानाः फिनिसिङया ज्या क्वचायेके धुंकाः जक नियमित सञ्चालनय् हयेगु तयारी जुयाच्वंगु दु । अन्डरपास नियमित रुपं सञ्चालनय् वल धाःसा कलंकी लागाय् जुइगु जाम म्हो जुइगु विश्वास आयोजनां यानाच्वंगु दु । अन्डरपास चीन सरकारया ग्वाहालिं दयेकूगु खः ।