‘पद्मरत्नयात ‘नेपालरत्नं छाय्पीमाः’

येँ – पद्मरत्न तुलाधरया नां नोबेल शान्ति पुरस्कारया निंतिं सिफारिस याये न्ह्यः दकलय् न्हापां नेपाःया दकलय् तःधंगु मान पदवी ‘नेपालरत्नं’ विभूषित यायेमाः । थुगु पदवीपाखें सम्मानित याये फत धाःसा जक वय्कःयात राष्ट्रं सम्मान याःगु जुइ ।’नयाँ शक्ति पार्टीया संयोजक नापं पुलांम्ह प्रधानमन्त्री डा. बाबुराम भट्टराईं थ्व खँ धयादीगु खः ।

राष्ट्रिय विभूति शंखधर साख्वाः राष्ट्रिय प्रतिष्ठानया ग्वसाः व नेपालभाषा मंकाः खलः यलया सह–आयोजनाय् ‘नेपाल संवत्या आन्दोलनय् पद्मरत्नया भूमिका’ विषयय् जूगु गोष्ठी न्ववासें वय्कलं नेपाल संवत्आन्दोलनयात थौंया अवस्थाय् थ्यंकेत पद्मरत्न तुलाधरया विशेष योगदान दुगु खँयात राष्ट्रं ल्वःमंके मजिउ धयादिल ।

संघीय मामिला तथा सामान्य प्रशासन मन्त्री लालबाबु पण्डितं नेपाल संवत्या सांस्कृतिक ¥याली नकतिनि पिहां वःबलय् थम्हं नं ब्वति कयागु व अबले तक नेपाल संवत् व शंखधर धइम्ह सु धकाः मसिउगु खँ कनादिल । पुलांम्ह राज्यमन्त्री तीर्थराम डंगोलं पद्मरत्न तुलाधरयात नेपाल सरकार व जनस्तरं नोबेल शान्ति पुरस्कारया निंतिं नां सिफारिस यायेमाःगु बिचाः तयादिल ।

नेवाः न्ह्यलुवा मल्ल के. सुन्दरं नेपाल संवत्या आन्दोलन राणाकालय् हे शुरु जूगु खँ न्ह्यथँसें अबलय् नेपाल संवत्या आन्दोलन न्ह्याकेगु ज्या धर्मादित्य धर्माचार्यं कलकत्ताय् च्वनाः यानादीगु खः धयादिल । वय्कलं पंचायतया निरंकुश शासनया इलय् नं पद्मरत्न तुलाधर लगायत छुं छुं भाषाह्यमिपिं जानाः गुकथं आन्दोलन न्ह्याकागु खः धइगु लुमन्ति नं कनादिल ।

ज्याझ्वलय् नेवाः न्ह्यलुवापिं डा. पुष्पराज राजकर्णिकार, नरेशवीर शाक्य लिसें पद्मरत्न हना ज्याझ्वः समितिया नायः लक्ष्मीदास मानन्धरपिंसं नं न्ववानादीगु खः । सभापति नापं प्रतिष्ठानया नायः श्यामकृष्ष्ण मानन्धरं देय्या आपालं थासय् शंखधर साख्वाःया झ्वाता पलिस्था यायेत सफल जूगु व थुकिया लिउने पद्मरत्न तुलाधरं न्ह्याकूगु आन्दोलनया देन व उपलब्धि दुगु खँ कनादिल ।